Azərbaycan, Bakı, 27 may/ Trend , müxbir E.Babayev/ Azərbaycanın hakimYeni Azərbaycan Partiyası (YAP) hesab edir ki, müxalifətin siyasi imkanları məhdudlaşıb. "Müxalifətin sosial bazası əriməkdədir, bu cür düşərgənin hansı imkanlarından danışmaq olar", çərşənbə axşamı jurnalistlərə YAP İdarə Heyətinin üzvü, Milli Məclisin komissiya sədri Arif Rəhimzadə bildirib.
Trend -un arayışı: Müxalifət partiyaları Azərbaycanda seçkiqabağı yaradılan mühitdən narazıdır. Seçki Məcəlləsinə əlavə və dəyişiklikləri nəzərdə tutan layihənin bu ayın sonunda Milli Məclisdə qəbulu gözlənilir. Dəyişikliklər sırasında dövlət KİV-də təbliğatın qadağan olunması, namizədlər üçün depozitin 33 min manatdan 300 min manata qaldırılması, İnzibati Xətalar Məcəlləsinin tətbiqi nəticəsində namizədliyin qeydiyyatının ləğvinin sadələşdirilməsi kimi məsələlərin yer alması müxalifətin narazılığına səbəb olub və partiyalar daxilində boykota meyl artıb. Məcəllədə müxalifətin təklif etdiyi seçki komissiyalarının paritet əsasda formalaşdırılması əksini tapmayıb.
Azərbaycanda prezident seçkisi oktyabrın 15-də keçiriləcək. Üç partiyanın (Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku isə seçkini boykot etmək istəyir. İndiyə qədər Müsavat Partityasının başqanı İsa Qəmbərin, ADP sədri Sərdar Cəlaloğlunun, Yaşıllar Partiyasının sədri Mais Güləliyevin namizədliyi təmsil olunduqları partiyalar tərəfindən irəli sürülüb. Bundan başqa, Azərbaycan Naminə İctimai Forumun rəhbəri Eldar Namazov müstəqil şəkildə namizədliyini irəli sürüb. Hakim Yeni Azərbaycan Partiyası isə hazırki dövlət başçısı İlham Əliyevin namizədliyini irəli sürmək niyyətindədir.
Rəhimzadə deyib ki, müxalifətin seçkiqabağı demokratik mühitin yaranmaması ilə bağlı iradları obyektiv deyil. "Müxalifətdaxili vəziyyət göstərir ki, müxalifət partiyaları ortaq məxrəcə gələ bilmir" - Rəhimzadə əlavə edib.
"Azadlıq" blokunun həmsədri, müxalif Vətəndaş və İnkişaf Partiyasının (VİP) sədri Əli Əliyev isə Trend -a bildirib ki, müxalifət partiyalarının kifayət qədər sosial bazası var. Sadəcə, hakimiyyət müxalifətin fəaliyyətindən çəkinərək, onların fəaliyyətinin qarşısını inzibati üsullarla alır.
Məqalə müəllifi ilə əlaqə ünvanı: [email protected]
