Qazaxıstan, Astana, 03 iyul / Trend , müxbir K.Konırova/ ATƏT Parlament Assambleyasının yeni seçilmiş sədri "dondurulmuş" Ermənistan-Azərbaycan Dağlıq Qarabağ münaqişəsinin nizamlanması üçün bütün mümkün səyləri həyata keçirməyə hazırdır.
"Biz bu problemi umumi səylərlə həll etməyə can atırıq. Və mən deməliyəm ki, bu, ATƏT PA-nın yeni seçilmiş sədri kimi mənim də rəhbərliyimə aiddir. Mən mümkün olan hər şeyi etməyə və Dağlıq Qarabağ münaqişəsinin həlli yollarının axtarışı üçün bizdə olan bütün vasitələrdən istifadə etməyə çalışacağam", - deyə cümə axşamı Astanada ATƏT Parlament Assambleyasının sədri Joao Suares bildirib.
Onun sözlərinə görə, ATƏT-in Parlament Assambleyası bu məsələdə həlledici rol oynamalıdır. "Dünən ATƏT sədri Aleksandr Stubbun təşkilatın təkcə münaqişələri idarə etməli olması deyil, həm də problem və münaqişələri həll etməli olması barədə dedikləri mənim xoşuma gəldi. Mən bu mexanizmi tam olaraq dəstəkləyirəm", - deyə Suares Astanada ATƏT PA-nın 17-ci sessiyasının yekunu üzrə keçirilən mətbuat konfransında bildirib.
"Qeyd etmək istəyirəm ki, möcüzə göstərə bilmərəm, lakin biz əlimizdən gələni etməyə çalışırıq. Mən sizi buna inandırıram", - deyə sədr əlavə edib. İki Cənubi Qafqaz ölkəsiarasında münaqişə 1988-ci ildə Ermənistanın Azərbaycana qarşı ərazi iddiası irəli sürməsi zəminində yaranıb. Azərbaycan torpaqlarının 20%-i, yəni Dağlıq Qarabağ ərazisi və bu əraziyə bitişik 7 rayon Ermənistan Silahlı Qüvvələrinin işğalı altındadır. 1994-cü ildə tərəflər atəşkəs rejiminə dair razılaşma əldə ediblər və o vaxtdan bəri ATƏT-in Minsk Qrupunun himayəsi altında, Rusiya, Fransa və ABŞ-ın həmsədrliyi ilə hələ ki nəticəsiz sülh danışıqları aparılır.
Məqalə müəlliıfi ilə əlaqə ünvanı: trend
