Azərbaycan, Lənkəran, 08 iyul / Trend , müxbir P.Əliyeva/ Azərbaycanın cənub bölgəsində 6 ay ərzində narkotiklərin qanunsuz dövriyyəsi ilə bağlı 33 cinayət faktı aşkarlanıb.
Bu dövrdə qanunsuz dövriyyədən 36 kq 275 qram narkotik vasitə çıxarılıb.
Narkotik vasitələrin 18 kq 790 qramı tiryək, 10 kq 87 qramı həşiş, 7 kq 394 qr heroin, 3 qramı marixuana olub.
Daxili İşlər Nazirliyinin (DİN) Baş Narkotiklərlə Mübarizə İdarəsinin cənub bölgəsi üzrə şöbəsindən çərşənbə axşamı Trend -a bildiriblər ki, hesabat dövründə aşkarlanan 33 cinayət faktı üzrə 29 vətəndaş həbs olunub və onlardan biri İran vətəndaşıdır.
Narkotik maddələrin qanunsuz dövriyyəsinə dair faktların 4-ü qaçaqmalçılıqla bağlıdır.
Ötən ilin 6 ayında isə 43 cinayət faktı üzrə 53 kq 8 qram narkotik vasitə aşkarlanıb.
Bu ilin 5 ayı ərzində Azərbaycanda hüquq mühafizə orqanları 550 kiloqramdan çox narkotik vasitəni qanunsuz dövriyyədən çıxarıb. Bunun 397 kiloqramı həşiş, 94 kiloqramı tiryək, 36 kiloqramı marixuana, 23 kiloqramı isə heraindir. Ancaq beynəlxalq narkotiklərin tranzitinə çevrilən bir ölkədə dövriyyədə məhz bu qədər mal olduğu çoxlarında şübhə doğurur.
MDB-nin Statistika Komitəsinin məlumatına görə, ötən ilin ilk altı ayı ilə müqayisədə bu il narkomaniya ilə bağlı cinayətlərin sayı Azərbaycanda 12%, Belarus və Ukraynada 6%, Rusiyada 3%, Tacikistanda isə 2% artıb. Ermənistanda isə belə cinayətlərin sayı əksinə, azalıb - 49% olub.
Məqalə müəllifi ilə əlaqə ünvanı: [email protected]