Azərbaycan, Bakı, 01 avqust / Trend , müxbir E.Babayev/ Hakim Yeni Azərbaycan Partiyası (YAP) qarşıdakı prezident seçkisində müxalifətdən olan namizədlərin sayının az olacağı və boykota meylin güclənməsi barədə proqnozları əsassız hesab edir. "Bu gün artıq seçkidə iştirak etmək istədiyini bildirən 10 - a yaxın namizədin adı səslənir və seçicinin də seçmək imkanları olacaq. Biz seçkilərdə indiki iqtidara qarşı fərqli mövqedə olan namizədlərin iştirakını görəcəyik",- cümə günü Trend -a YAP Siyasi Şurasının üzvü, millət vəkili Aydın Mirzəzadə bildirib.
Trend -un arayışı: Azərbaycanda prezident seçkisi oktyabrın 15 - də keçiriləcək. Üç müxalifət partiyasının (Azərbaycan Xalq Cəbhəsi, Vətəndaş və İnkişaf, Liberal) təmsil olunduğu "Azadlıq" bloku seçkini boykot edəcəyi barədə qərar verib. Vətəndaş Həmrəyliyi, Kommunist, Böyük Quruluş partiyaları seçkidə öz namizədi ilə çıxış etməyəcək. Ümid Partiyasının sədri İqbal Ağazadənin, Müasir Müsavat Partiyasının sədri Hafiz Hacıyevin, Liberal Demokrat Partiyasının sədri Fuad Əliyevin namizədliyi təmsil olunduqları partiyalar tərəfindən rəsmən irəli sürülüb.
Hələ bu ilin əvvəllərindən seçkidə iştirak edəcəyini bəyan edən Müsavat və Demokrat partiyaları avqustun 2 - də seçkidə iştirak edib-etməməklə bağlı yekun qərarlarını açıqlayacaqlar. Hakim Yeni Azərbaycan Partiyası isə, hazırki dövlət başçısı İlham Əliyevin namizədliyini irəli sürmək niyyətindədir.
Mirzəzadə bildirib ki, boykot yolu tutan qüvvələrin mövqeləri cəmiyyət və digər siyasi partiyalar tərəfindən müdafiə olunmayacaq. "Əvvəla, "Azadlıq" bloku əvvəlki qüvvəyə malik deyil. Bu blok xeyli zəifləyib, sosial bazası dağılıb. Bu blokdan xeyli nüfuz çıxıb gedib və ya mövqeyini dəyişib. Buna görə də blokun yalnız adı qalıb. Prinsipcə, blok boykot qərarı ilə özünün siyasi iflasına imza atmış olub. Gələcəkdə "Azadlıq" blokunu müstəqil güc mərkəzi kimi görə bilməyəcəyik. Onlar özləri bu seçimi ediblər" - deyən Mirzəzadə düşünür ki, boykota meyl heç də güclənməyib . "Seçki müxalifətlə iqtidar arasında keçirilmir. Seçki seçkidə iştirak etmək istəyən insanlar arasında keçirilir. Bu gün Azərbaycanın siyasi qüvvələri bir iqtidardan və boykot mövqeyi tutan, eləcə də bu yolu tuta biləcəyini deyən partiyalardan ibarət deyil. Fərqli və müxtəlif mövqedə duran onlarla siyasi mərkəzlər var" - deyə o əlavə edib.
"Azadlıq" blokunun həmtəsisçisi, AXCP sədri Əli Kərimli isə, bildirib ki, artıq bizim boykot addımı seçkinin gedişatına təsir edib. Seçkiyə start verilsə də, ölkədə heç bir seçki ab-havası yoxdur. Kərimlinin sözlərinə görə, hazırda ictimai müzakirə bir mövzuda gedir: "Seçkilər boykot olunsun, yoxsa olunmasın. Digər tərəfdən, boykot qərarı cəmiyyət tərəfindən dəstəklənir. Bu gün ictimai-siyasi mühitdə, demək olar ki, seçkilər boykot olunub və seçkini xatırladan heç bir əlamət yoxdur" - deyə o əlavə edib.
Məqalə müəllifi ilə əlaqə ünvanı: [email protected]
