Azərbaycan, Bakı, 26 avqust / Trend , müxbir İ.Əlizadə/ Azərbaycanın iqtidaryönlü Ana Vətən Partiyası (AVP) prezident seçkiləri ilə bağlı tədbirlər planı hazırlayıb.
"Mənim rəhbərliyim ilə seçkilərdə təbliğat-təşviqat dövründə hansı formada iştirak etmək, hansı metodlardan yararlanmaqla bağlı tədbirlər hazırlanıb. AVP seçkiləri müşahidə edəcək və bunun üçün partiya üzvləri ayrılacaq", çərşənbə axşamı Trend -a AVP sədri, millət vəkili Fəzail Ağamalı bildirib.
Trend -un arayışı: AVP-nin iyul ayında keçirilən V qurultayında hazırki dövlət başçısı, Yeni Azərbaycan Partiyasının (YAP) sədri İlham Əliyevin prezidentliyə namizədliyi irəli sürülüb.
Azərbaycanda prezident seçkisi oktyabrın 15-də keçiriləcək. İndiyə qədər prezidentliyə iddialıların sayı 18-ə çatıb.
Ağamalı bildirib ki, AVP-nin seçkilərlə bağlı fəaliyyəti təkcə İlham Əliyevin namizədliyini dəstəkləmək barədə qərarla yekunlaşmır.
"Partiyaının yaxın bir neçə həftə ərzində Mərkəzi Şurası keçiriləcək. İclasda AVP-nin seçkilərə hazırlığı ilə bağlı məsələlər müzakirə olunacaq və biz qüvvələrimizi seçki ilə bağlı bir daha səfərbər edəcəyik", - deyən Ağamalı vurğulayıb ki, AVP özünün seçkilərlə bağlı işlərini hakim Yeni Azərbaycan Partiyası ilə birgə əlaqələndirərək həyata keçirəcək. "Biz müdafiə etdiyimiz namizədin mütləq səs çoxluğu ilə qələbə qazanması üçün mümkün və qanunauyğun olan bütün addımlardan istifadə edəcəyik", - deyə o əlavə edib.
AVP 1990-cı ildə Ağamalı tərəfindən yaradılıb. Partiya hakimiyyətin siyasətini müdafiə edir və 2003-ci il prezident seçkisində İlham Əliyevin namizədliyini irəli sürüb.
Məqalə müəllifi ilə əlaqə ünvanı: [email protected]