Azərbaycan, Bakı, 08 sentyabr / Trend , müxbir T. Cəfərov/ İranda təhsil nazirinin parlamentdə hesabat (istizah) verməsinin ləğv edilməsinin əsl səbəbi hakim partiyanın nüfuzu, istəyi və növbəti prezident seçkiləri ilə əlaqəlidir.
"Parlament nümayəndələrinin əksəriyyəti hakimiyyətin tərəfdarlarıdır, bu baxımdan da hesabatın baş tutmaması gözlənilən idi", - deyə beynəlxalq məsələlər üzrə ekspert Cəfər Məhəmmədi bildirib.
Fars agentliyinin məlumatına əsasən, dünən İranın təhsil naziri Əli Əhmədinin hesabat layihəsi parlament nümayəndələri tərəfindən dinlənilmədən ləğv edilib. İranın İslam Şurası Məclisinin 80 nümayəndəsi təhsil naziri Əli Əhmədinin hesabat verməsini tələb edib. Nazirin hesabata cəlb edilməsi üçün nümayəndələr tərəfindən toplanmış imzalar ötən həftənin çərşənbə axşamı parlamentə təqdim edilib. Bazar gününə kimi isə İslam Şurası Məclisinin daha 6 nümayəndəsi hesabatın verilməsi üçün imzasını təqdim edib. Məclisin ümumilikdə 299 üzvü var.
Məhəmmədi bildirib ki, qanuna əsasən, əgər Nazirlər Kabinetindən İranın təhsil nazirindən başqa daha iki nazirin hesabatı dinlənilməyə təqdim edilsəydi, bu yetərli idi ki, Nazirlər Kabinetinin fəaliyyəti bütünlüklə yenidən baxılsın. Onun sözlərinə görə, Nazirlər Kabinetinin fəaliyyətinin araşdırılması və səlahiyyətlərinə yenidən baxılması əslində hakimiyyətin süqutu demək deyil, qanuni bir prosesdir. Belə ki, parlament nazirlərin səlahiyyətlərini yenidən araşdıraraq, onların vəzifədə saxlanılıb-saxlanılmamasını müəyyənləşdirmək hüququna malikdir.
Ekspertin fikrincə, parlament nümayəndələri prezident seçkilərinə az qalmış müddətdə nazirliklərdən hesabat alınmasının problemlərlə nəticələnəcəyini çox yaxşı bilirlər. Bu səbəbdən də hesabatdan nazirləri sıxışdırmaq üçün vasitə kimi istifadə edirlər.
Britaniyada fəaliyyət göstərən iranlı ekspert Əlirza Nurizadə Trend -a açıqlamasında bildirib ki, Mahmud Əhmədinejad İran İslam Respublikası yarandığı dövrdən etibarən prezidentlər arasında "komandası" daha çox dəyişmələrə məruz qalan prezidentdir. "Əhmədinejadın nazirlərinin əksəriyyəti ya parlamentdə hesabata çəkilib, ya da əvəz edilib. Bu qədər məmurun əvəzlənməsi hökumətin nüfuzunu şübhə altına alır. Fikrimcə, əgər dünən təhsil naziri Əli Əhmədi hasabat verməli olsaydı, Əhmədinejad özü hesabata məruz qalacaqdı", - deyə Nurizədə bazar ertəsi telefonla Londondan bildirib.
Nurizadə düşünür ki, Əhmədinejad İranın dini lideri Əli Xameneidən qalan qısa müddət ərzində hakimiyyəti dəstəkləməsini xahiş edib, bu səbəbdən də spiker Əli Laricaninin təşəbbüsü ilə parlament nümayəndələri təhsil nazirinin hesabatını dinləməkdən vaz keçiblər.
Baxmayaraq ki, parlament nümayəndələrin böyük əksəriyyəti Əhmədinejad hakimiyyətinin tərəfdarlarıdırlar, onlar dəfələrlə nazirlərin fəaliyyətini parlament iclaslarında tənqid atəşinə tutublar.
"Fikrimcə, Əhmədinejadı qarşıda daha böyük problemlər gözləyir. Daxili işlər naziri Əli Kordanın təhsil haqqında diplomunun saxta olması ilə bağlı qalmaqallar onu göstərir ki, parlament nümayəndələri Əhmədinejadı rahat buraxmayacaqlar", - deyə ekspert əlavə edib.
İranın təhsil naziri Əli Əhmədi ötən ilin fevral ayından bu posta təsdiq olunub. Əli Əhmədi bundan qəbaq Pəyame Nur Universitetinin rektoru vəzifəsində çalışıb. Bununla cari ildə İran parlamenti Əhmədinejadın sayca ikinci nazirinin hesabatının ləğv edilməsi barədə qərar çıxarıb. Bundan öncə, bu ilin aprel ayında ticarət naziri Məsud Mirkaziminin hesabatı da dinlənilmədən ləğv edilmişdi.
Məqalə müəllifi ilə əlaqə saxlamaq üçün elektron ünvan [email protected]
