...

Azərbaycanın müxalifət düşərgəsini birləşdirən vahid koordinasiya mərkəzinin yaradılmasına ehtiyac var

Siyasət Materials 23 Oktyabr 2008 16:13 (UTC +04:00)

Azərbaycan, Bakı, 23 oktyabr / Trend , müxbir A.Hüseynbala / Azərbaycanın müxalifət düşərgəsini birləşdirən vahid koordinasiya mərkəzinin yaradılmasına ciddi ehtiyac var, - "Azərbaycan Naminə" İctimai Forumun rəhbəri Eldar Namazov hesab edir.

"Yeni yaranacaq quruma siyasi partiyalar, ictimai təşkilatlar və qeyri - hökumət sektorunda çalışan tanınmış adamlar cəlb olunmalıdırlar", - cümə axşamı Trend - a Müxalifətin Əməkdaşlıq Mərkəzinə daxil olan "Azərbaycan Naminə" İctimai Forumun rəhbəri Eldar Namazov bildirib.

Trend - un arayışı: Müxalifətin Əməkdaşlığı Mərkəzinə "Azadlıq" bloku (Azərbaycan Xalq Cəbhəsi, Liberal, Vətəndaş və İnkişaf partiyaları), Müsavat Partiaysı və "Azərbaycan Naminə" İctimai Forum (ANİF) daxildir. Sentyabrın əvvəlində bu siyasi təşkilatlar oktyabrın 15 - də keçirilən prezident seçkisini qanunsuz tanımaq barədə birgə bəyanat imzalayıblar. Bəyanatda prezident seçkisindən sonra formalaşacaq hakimiyyət qeyri - legitim elan edilib.

Namazov deyib ki, Müxalifətin Əməkdaşlıq Mərkəzinin (MƏM) tərkibinin genişlənməsinin əsas prinsipi Azərbaycanda demokratik dəyişiklikləri arzulayan, bu sahədə çalışan qüvvələrin birliyinin təminatı olmalıdır.

"Amma birləşmə gündəmə gələndə bir sıra prinsipial məsələ ortaya çıxır. Azərbaycanda özünü müxalifət və demokratik qüvvə adlandıran çoxsaylı təşkilatlar var. Bunların bir çoxunun yürütdüyü siyasətsə, bu prinsiplərə uyğun deyil", - Namazov xatırladıb.

ANİF rəhbərinin sözlərinə görə, birləşmə üçün meyarları dəqiq müəyyənləşdirmək lazımdır ki, MƏM-in tərkibinin genişlənməsi süni xarakter daşımasın.

" Düşünürəm ki, Azərbaycanın gələcəyi və demokratik dəyişikliklərlə bağlı müxalifətin vahid strategiyası hazırlanmalıdır. Bizim əməkdaşlığımız da yalnız həmin strategiyanı dəstəkləyən siyasi hərəkatlarla qurulmalıdır", - Namazov vurğulayıb.

Məqalə müəllifi ilə əlaqə ünvanı: [email protected]

Xəbər lenti

Xəbər lenti