Azərbaycan, Bakı, 20 dekabr / Trend / AzərTAc
Dövlət İnformasiya Agentliyinin yaydığı
məlumata görə, Azərbaycan Prezidenti İlham Əliyev
dekabrın 20-də Bakının Yasamal rayonunda
mədəniyyət və istirahət parkının,
Heydər Əliyev məktəb-muzeyinin və rayon icra
hakimiyyətinin yeni binasının
açılışında iştirak etmişdir.
Rayon İcra hakimiyyətinin başçısı İbrahim
Mehdiyev Prezident İlham Əliyevə məlumat verərək
bildirib ki, 1,7 hektar sahəsi olan, vaxtilə Nazim Hikmət
küçəsi ilə Mətbuat prospektinin kəsişməsində
salınmış və uzun müddət baxımsız
qalmış park xüsusi layihə əsasında bir il
ərzində müasir səviyyədə tamamilə
yenidən qurulmuşdur. Burada yaraşıqlı
fəvvarələr və şəlalələr kompleksi
yaradılmış, ən hündür yerdə
Azərbaycanın dövlət bayrağı ucaldılmışdır.
Parkda hər cür hava şəraitinə davamlı
materiallardan hazırlanmış 254 oturacaq qoyulmuş, 8,5 min
kvadratmetr sahədə çəmənlik salınmış,
3500-dən çox müxtəlif ağac və gül
kolları əkilmişdir.
Prezident İlham Əliyev sonra Heydər
Əliyev məktəb-muzeyinin açılışında
iştirak edib. Dövlət başçısı
açılışı bildirən lenti kəsib,
məktəb-muzeylə tanış olub, xatirə kitabına
ürək sözlərini yazıb.
Prezident İlham Əliyev daha sonra Yasamal Rayon İcra Hakimiyyətinin yeni binasının açılışında iştirak edib. Prezident İlham Əliyev iş otaqları ilə tanış olub, yaradılmış şəraitdən, habelə ərazidə aparılmış yenidənqurma və abadlıq işlərindən razılığını bildirib.