Azərbaycan, Bakı, 26 dekabr / Trend , müxbir T.Cəfərov/ İranın tanınmış kinorejissoru Azərbaycanda kino sənətinin inkişafı üçün yaxşı potensialın olduğunu bildirib.
Dekabrın 22-dən 25-dək Bakıda tələbə filmlərinin 5-ci "Start" Beynəlxalq festivalı keçirilib. Festivalda Azərbaycan, Türkiyə, Gürcüstan, İran, Rusiya, Belarus, Misir və digər ölkələrin tələbə-rejissorları iştirak ediblər. Müxtəlif ölkələrin peşəkar kinomatoqrafçılarından ibarət Münsiflər Heyəti festivala təqdim olunan 200 filmdən yalnız 50 filmi seçib.
Bu festivalda münsiflər heyəti tərkibində iştirak edən İranın tanınmış kinorejissoru Məhəmməd Şirvani Trend -a bildirib ki, bu, onun Azərbaycana ilk səfəridir. "Mən səfərdən əvvəl Azərbaycan filmləri ilə yaxından tanış deyildim, lakin "Start" beynəlxalq kinofestivalında Azərbaycan gənclərinin kinoya olan marağı məni heyrətləndirdi",-deyə, Şirvani bildirib.
O əlavə edib ki, Azərbaycan kinosunun gələcəyini parlaq görür. "Gənclər və Tələbələr Azərbaycan kinosunun gələcəyidir. Onların "Start" kinofestivalda fəal iştirakı, Azərbaycan gənclərinin kino sənətinə marağını göstərir",-deyə Şirvani bildirib.
Şirvaninin fikrincə, Azərbaycan hazırda bütün sahələrdə inkişaf edir, təbiidir ki, bu inkişaf kino sənətində də aparılır.
"İran kinosuna digər ölkələrin kinosu yaxşı təsir göstərdiyi kimi, Azərbaycan kinosuna da İran kinosunun yaxşı təsiri var",-deyə Şirvani bildirib.
Bu festival Mədəniyyət və Turizm, Gənclər və İdman Nazirliklərinin dəstəyi ilə, Nizami kino-teatrında keçirilib.
Seyid Məhəmməd Hüseyn Şirvani 1973- cü ildə Tehran şəhərində anadan olub. Universitetdə rəssamlıq fakultəsini bitirib. Şirvanin ilk qısametrajlı filmi 1999-cu ildə Kann kinofestivalında yaxşı film nominasıyasını alıb.
Şirvani İranın Fəcr və Cənubi Koreyanın Pusan festivallarının ən yaxşı rejissoru nominasiyasında qalib olub.
Müəlliflə əlaqə saxlamaq üçün elektron ünvan [email protected]
