Azərbaycan, Bakı, 03 aprel / Trend , müxbir N.Abdullayeva /
NATO Baş katibinin xalq diplomatiyası məsələləri üzrə köməkçisi Jan-Fransua Büro Bakıda Azərbaycan ilə alyansın əməkdaşlıq məsələlərini müzakirə edəcək.
Rumıniyanın Azərbaycandakı səfirliyindən Trend -a verilən məlumata görə, Büro Bakıya aprelin 8-də gələcək.
Büronun NATO-nun 60 illik yubileyinə həsr olunmuş beynəlxalq konfransda iştirakı gözlənilir.
Konfrans aprelin 9-da Bakıda keçiriləcək.
Səfirlikdən bildiriblər ki, tədbirdə Azərbaycanın xarici işlər nazirinin müavini Araz Əzimov, Rumıniyanın xarici işlər naziri Kristian Dyakonesku da iştirak edəcək.
Konfransda alyansın yaranma tarixi, həmçinin onun sülhməramlılığı, münaqişələrin nizamlanmasında NATO-nun rolu barədə məruzə dinləniləcək.
Azərbaycan ilə NATO arasında əməkdaşlığın əsası 1994-cü il 4 may tarixində "Sülh naminə tərəfdaşlıq" proqramının - çərçivə sənədin imzalanması ilə qoyulub.
Azərbaycan bu proqrama ilk qoşulan ATƏT-in 27 üzv dövlətindən olub.
Qarşılıqlı fəaliyyətin konkret istiqamətlərini müəyyən edən "Sülh naminə tərəfdaşlıq" proqramı çərçivəsində rəsmi sənəd 1996-cı ilin aprel ayında imzalanıb. Hazırda Azərbaycan bu proqrama müvafiq olaraq üzərinə qoyulmuş təxminən 50 vəzifəni yerinə yetirir. Azərbaycan Prezidenti İlham Əliyev 2005-ci il 3 avqust tarixində "Azərbaycan Respublikasının NATO ilə fərdi tərəfdaşlıq üzrə fəaliyyət Planının təsdiqi haqqında" Fərman imzalayıb.
Hazırda əməkdaşlıq "Azərbaycan Respublikasının NATO ilə fərdi tərəfdaşlıq üzrə fəaliyyət Planı"nın ikinci mərhələsi çərçivəsində həyata keçirilir.
Azərbaycan NATO ilə alyansın İraq və Kosovoda sülhməramlı missiyası çərçivəsində əməkdaşlıq edib, hazırda bu kimi əməkdaşlıq Əfqanıstanda davam etdirilir.
Məqalə müəllifi ilə əlaqə ünvanı: [email protected]