Azərbaycanın müxalifət partiyası seçki və siyasi bloklara qoşulmayacaq
Azərbaycan, Bakı, 08 oktyabr / Trend , müxbir A.Hüseynbala/
Azərbaycanın müxalifət partiyası heç bir seçki və siyasi bloklara qoşulmaq niyyətində deyil.
"Partiyanın alı orqanlarının bloklara qoşulmamaqla bağlı qərarına yeni rəhbərlik də əməl edəcək", - cümüə axşamı Trend -a Açıq Cəmiyyət Partiyasının (ACP) yeni sədri Vaqif Mahmudov bildirib.
Trend -un arayışı: Açıq Cəmiyyət Partiyasının sentyabrın 20-də keçirilən Ali Məclisinin iclasında Vaqif Mahmudov partiyanın yeni sədri seçilib.
2009-cu ilin iyun ayında Akif Şahbazov Açıq Cəmiyyət Partiyasının (ACP) sədri vəzifəsindən istefa verib. İdarə Heyətinin toplantısında Ali Məclisin sədri Vaqif Mahmudova sədrin səlahiyyətlərinin icrası həvalə olunub.
Mahmudovun sözlərinə görə, bu qərar digər partiyalarla əməkdaşlığa tamamilə məhdudiyyət qoyulması deyil. "Biz istər müxalifət, istərsə də hakimiyyətyönlü partiyalarla bir sıra məsələrlə bağlı ikitərəfli əməkdaşlığı istisna etmirik", - partiya sədri əlavə edib.
Onun fikrincə, ikitərəfli əməkdaşlıq zamanı partiyalar öz öhdəliklərini daha yaşxı və çevik yerinə yetirməyə üstünlük verir.
"Bu zaman ikitərəfli əməkdaşlıq həm də daha effektli olur", - Mahmudov qeyd edib.
ACP sədri deyib ki, partiyanın mühacirətdə olan lideri Rəsul Quliyevlə müxalifətdaxili əməkdaşlıq və digər məsələlərlə bağlı vaxtaşırı məsləhətləşmələr aparır.
"Rəsul müəllim fəaliyyətimizə birbaşa müdaxilə etməyəcəyini bildirib. Amma bir çox vacib məsələlərlə bağlı liderimizin məsləhətlərinə və tövsiyələrinə ehtiyacımız olur", - Mahmudov vurğulayıb.
Onun sözlərinə görə, Quliyevin Azərbaycana qayıdışı məsələsi də gündəmdədir. "Bununla bağlı həm liderimiz, həm də biz müəyyən fəaliyyət göstəririk. Düşünürəm ki, nə zamansa Quliyevin vətənə qayıdışı reallaşacaq", - ACP sədri bildirib.
Sağ mərkəzçi, müxalifətyönlü ACP 2007-ci ilin aprelində təsis olunub. Partiyanın lideri Azərbaycanın eks-spikeri, hazırda mühacirətdə yaşayan Rəsul Quliyevdir. 2007-ci ilin fevralınadək ADP-nin sədri olmuş Quliyev və onun tərəfdarları etiraz olaraq ADP-dən imtina edərək özlərinin Açıq Cəmiyyət Partiyasını yaradıblar. ACP 2008-ci il oktyabrın 15-də keçirilən prezident seçkilərində iştirak etməmək barədə qərar qəbul etsə də, hakim Yeni Azərbaycan Partiyasının namizədi İlham Əliyevi dəstəkləyib.
Məqalə müəllifi ilə əlaqə ünvanı: [email protected]
