Azərbaycan, Bakı, 2 aprel /Trend, müxbir K.Zərbalıyeva/
Bakıda bu ilin 3 ayında baş verən yol qəzaları ötən ilin müvafiq dövrü ilə müqayisədə artıb.
Bakı Şəhər Dövlət Yol Polisi İdarəsinin ictimaiyyətlə əlaqələr şöbəsinin rəisi Cəmşid Hənifəyev cümə günü Trend-ə bildirib ki, yanvar-mart aylarında Bakıda 238 yol qəzası zamanı 82 nəfər həlak olub, 240 nəfər xəsarət alıb.
Şöbə rəisi bildirib ki, bu ilin ilk 3 ayında Bakıda baş vermiş qəzalar ötən illə müqayisədə 2,6 faiz, ölüm 6 faiz, xəsarət isə 32 faiz artıb.
Qəzaların 144-ü piyadavurmadır. Qəzalarda 44 piyada həlak olub, 116 nəfər yaralanıb.
Bu ilin ilk rübündə Bakı Yol Polisi əməkdaşları 2066 sərxoş sürücünü cəzalandırıb.
380 sürücü qəza şəraiti yaratdığı üçün, 380-ni tabe olmadığı üçün, 3386-sı işıqforun qırmızı işığında keçdiyi üçün, 186-sı avtomobili nömrəsiz idarə etdiyi üçün, 1330-u isə pərdə və plyonkalı avtomobil idarə etdiyi üçün saxlanılaraq barələrində inzibati cəza tədbiri görülüb.
Hesabat dövründə yol-hərəkət qaydasını pozan 4004 piyada cərimələnib.
587 avtobus sürücüsü isə sərnişindaşıma qaydalarını pozduğu üçün cəzalandırılıb.