Azərbaycan, Bakı, 19 noyabr /Trend, müxbir S.Ağayeva/
Azərbaycan və Sloveniya növbəti illər üçün siyasi münasibətlərin perspektivlərini müəyyən edəcəklər.
İki ölkənin xarici işlər nazirləri Elmar Məmmədyarov və Samuel Jboqar gələn ilin əvvəlində rəsmi səfərlər mübadiləsi edəcəklər. Bu barədə cümə günü Trend-ə Sloveniyanın Azərbaycandakı baş konsulu Borut Mequşar məlumat verib.
"Sloveniyanın xarici işlər naziri bu ilin payızında Azərbayacana rəsmi səfərə gəlməyi planlaşdırmışdı, lakin səfər sonradan Azərbaycanda keçiriləcək parlament seçkiləri ilə əlaqədar daha sonrakı müddətə təxirə salındı", - baş konsul bildirib.
"Azərbaycanın xarici işlər naziri Elmar Məmmədyarovun rəsmi dəvəti artıq Samuel Jboqara çatdırılıb", - diplomat qeyd edib.
Nazirlərin qarşılıqlı səfərləri zamanı iki ölkə arasında siyasi, iqtisadi və humanitar sahələrdə əlaqələrin perspektivlərini, eləcə də regional əməkdaşlığı müzakirə etmək planlaşdırılır.
Tərəflər Avropa İttifaqı çərçivəsində əməkdaşlıq məsələləri ilə bağlı fikir mübadiləsi aparacaqlar.
Keçən ilin noyabrında Sloveniya Prezidenti Danila Türk Azərbaycanda rəsmi səfərdə olub. Səfər zamanı iki ölkə prezidentləri "Azərbaycan və Sloveniya arasında strateji əməkdaşlığın yaradılması haqqında birgə bəyanat" imzalayıblar.
