Azərbaycan, Bakı, 27 Dekabr /Trend, müxbir T.Hacıyev/
Azərbaycan müxalifətinin ictimai palatası - "Xalq Məclisi" bu həftə yaradıla bilər. Bu barədə bazar ertəsi Trend-ə Müsavat Partiyasının başqanı İsa Qəmbər deyib.
"Konkret layihələr var. Müzakirələr başlayıb və davam edəcək. İnanıram ki, müsbət nəticələr əldə olunacaq. Prosesdə iştirak edən siyasi partiyalar tərəfindən belə bir təşkilatın, ictimai hərəkatın yaranması barədə irəli sürülən təkliflər əsas götürülür", - Qəmbər əlavə edib.
Noyabrın 23-də Müsavat Partiyasının mərkəzi qərargahında 7 noyabr parlament seçkilərinin nəticələrini tanımayan namizədlərin forumu keçirilib. "AXCP-Müsavat" seçki blokunun təşəbbüsü ilə keçirilən forumda Milli İstiqlal, Klassik Xalq Cəbhəsi, Azadlıq, Demokratik Azərbaycan Dünyası, Azərbaycan Xalq partiyalarının təmsilçiləri və müstəqil namizədlər iştirak ediblər. Forumda parlament seçkiləri, sekçidən sonrakı vəziyyət müzakirə edilib.
Forumda həmçinin Milli Məclisə alternativ qurumun - "Xalq Parlamenti"nin yaradılması təklifi səsləndirilib. Bir sıra müxalif partiyaların funksionerləri mətbuata açıqlamalarında "Xalq Məclisi" ideyasının reallaşmasına qarşı olduqlarını qeyd ediblər.
Növbəti forumun dekabrın 28-də keçiriləcəyi gözlənilir.
