Azərbaycan, Bakı, 8 oktyabr /Trend, müxbir E.Mehdiyev/
"Demokratik Birlik" fraksiyasının yaradıcılarından olan Klassik Xalq Cəbhəsi Partiyasının (KXCP) keçmiş sədr müavini Fikrət Cəfərov oktyabrın 7-də KXCP Ali Məclisinin iclası zamanı fraksiyanın fəaliyyəti haqqında səsləndirilən tənqidlərə sərt cavab verib.
"Fraksiyanı tənqid edən və yaxud müəyyən 3-5 adamı qabağa verib tənqid etdirən şəxs ilk növbədə özü öz fəaliyyətinə baxmalıdır. Özü özünü tənqid etməlidir ki, niyə partiyanı bu günə salıb? Niyə partiyanı müxalifətin mərkəzindən yayındırıb aparıb dalana dirəyib? Bizim partiyanın sədri "uvajaemıy" Mirmahmud Mirəlioğlu hesabat versin bizə. O da görünür 3-5 nəfəri qabağa verib elə onun dalında gizlənməklə məşğuldur", - Cəfərov deyib.
O, bu məsələlərdən qurtarmaq lazım olduğunu vurğulayıb. "Yəni partiyanı kim, necə siyasi müxalifətin mərkəzindən yayındırıbsa, kimin nə deməyindən asılı olmayaraq, biz partiyanı elə də siyasi müxalifətin mərkəzinə qaytaracağıq", - Cəfərov bildirib.
O, fraksiyanın iclasının oktyabrın 13-də Müsavat Partiyasının qərərgahında keçiriləcəyini deyib.
İclas keçirmək üçün şərait yaratdığına görə Müsavat Partiyasına qarşı səsləndirilən ittihamlara münasibət bildirən Cəfərov bundan təəssüfləndiyini bildirib.
"Çox təəsüf ki, dünənki ali məclisdə bizim dostumuz yenə eyforiaya qapılıb Müsavat Partiyasını ittiham edib. Mən ona məsləhət görürəm ki, Azərbaycanın tarixində rolu olan 100 illik bir partiyanı ittiham, hədələmək yox, ona dəstək vermək lazımdır", - keçmiş sədr müavini deyib.
