Azərbaycan, Bakı, 17 oktyabr /Trend, müxbir E.Mehdiyev/
Klassik Xalq Cəbhəsi Partiyası (KXCP) partiya sədrinin keçmiş müavinlərinin sədrə qarşı fraksiya yaratmağını "ayıb hal" hesab edir.
"Əgər bu 3 müavinin narazılığı və ya təklifləri varsa, hər hansı bir formada partiya strukturlarında müzakirə edə bilərdilər. Bu məsələni partiyadan kənar iclas zallarında, mətbuatda hallandırmağın mənası yox idi. Mən şəxsən bunu qaranlıq məqam hesab edirəm. Bu, cəbhəçiliyə yaraşmayan bir işdir", - bunu Trend-ə açıqlamasında KXCP-nin sədr müavini Xəzər Teyyublu deyib.
Teyyublu indiki KXCP rəhbərliyinin partiyanı siyasi müxalifətin mərkəzindən uzaqlaşdırması ilə bağlı ittihamları əsassız sayır.
"Bütün bu ittihamlar əssasızdır. KXCP partiyaların inteqrasiyasının tərəfdarıdır və müxalifət partiyalarının bir yerdə olmasını arzulayır. KXCP hamı ilə bərabər səviyyədə fəaliyyət göstərə bilir", - Teyyublu deyib.
O qeyd edib ki, müavin kimi sədrin yanında fraksiya yaratmaq ən azı yolverilməzdir və funksiyanı bilməməkdir.
"Əgər müavin olaraq sədri qəbul etmirsənsə, kənara çəkilirsən və ya gedib sıravi bir üzv olursan. Fikrini bildirirsənsə, bu başqa şeydir. Ancaq müavinin sədrə qarşı fraksiya yaratması sadəcə gülüncdür. Mən bunu belə qiymətləndirirəm", - Teyyublu deyib.
Müsavat Partiyasının "Demokratik Birlik" fraksiyasına iclas keçirmək üçün yer verməsinə münasibət bildirən Teyyublu bunu yalnış addım kimi qiymətləndirib.
"Müsavat Partiyası ilə dost və ideoloji baxımdan yaxın bir təşkilatıq, lakin Müsavat Partiyası öz qərargahında fraksiyaçılara yer verməklə, partiyanın guya parçalanması anlamını, partiyada guya qarşıdurma olması anlamını yaratmaqla bu məsələlərə düzgün yanaşmadı", - Teyyublu deyib.
Lakin o hesab edir ki, bu, Müsavat ilə KXCP arasında münasibətlərə sərinlik gətirməyəcək.
Qeyd edək ki, KXCP-nin bir qrup üzvü bir araya gələrək "Demokratik Birlik" fraksiyası yaradıb. Lakin birliyin yaradılması partiya daxilində narazılıqlara səbəb olub.
