...

Azərbaycan və Fransa regional məsələləri müzakirə ediblər

Siyasət Materials 8 Dekabr 2012 20:15 (UTC +04:00)
Şənbə günü Azərbaycanın Xarici İşlər Naziri Elmar Məmmədyarov ölkəmizdə səfərdə olan Fransanın Xarici İşlər Nazirliyinin Kontinental Avropa idarəsinin direktoru Erik Furniyenin başçılıq etdiyi nümayəndə heyətini qəbul edib.
Azərbaycan və Fransa regional məsələləri müzakirə ediblər

Trend-i buradan izləyin

Azərbaycan, Bakı, 8 dekabr /Trend/

Şənbə günü Azərbaycanın Xarici İşlər Naziri Elmar Məmmədyarov ölkəmizdə səfərdə olan Fransanın Xarici İşlər Nazirliyinin Kontinental Avropa idarəsinin direktoru Erik Furniyenin başçılıq etdiyi nümayəndə heyətini qəbul edib.

XİN-dən Trend-ə verilən məlumata görə, görüş zamanı Nazir Elmar Məmmədyarov cari ilin 5-7 dekabr tarixlərində Dublin şəhərində keçirilmiş ATƏT-in Nazirlər Şurasının 19-cu iclası ilə bağlı təəssüratları ilə bölüşmüşdür. Nazir Elmar Məmmədyarov bildirmişdir ki, Azərbaycanın Avropa İttifaqı ilə əməkdaşlığının daha da inkişaf etdirilməsi ölkəmiz üçün mühüm əhəmiyyət kəsb edir. Ölkəmizin NATO ilə münasibətləri və əməkdaşlıq perspektivləri müzakirə edilmişdir.

Fransalı rəsmiyə regional layihələr haqda məlumat verən Nazir Elmar Məmmədyarov, bu layihələrin region və Avropa üçün əhəmiyyətini qeyd etmişdir.

Nazir Elmar Məmmədyarov təhlükəsizlik məsələləri haqda danışarkən, Azərbaycanın öz xarici siyasətində milli maraqlara üstünlük verdiyini və bütün gücümüzü müstəqilliyimizin möhkəmləndirilməsi üçün səfərbər olunduğunu vurğulamışdır. Ermənistan Azərbaycan münaqişəsinə toxunan Nazir Elmar Məmmədyarov, münaqişənin həllinə başlıca maneə kimi Ermənistan silahlı qüvvələrinin işğal edilmiş Azərbaycan ərazilərində mövcud olmasını göstərmişdir. Nazir Elmar Məmmədyarov bildirmişdir ki, Ermənistan silahlı qüvvələrinin Azərbaycan Respublikasının işğal edilmiş ərazilərindən çıxarılmasına başlanması münaqişənin həlli üçün geniş imkanlar yaradacaqdır. Münaqişənin həlli kontekstində Dağlıq Qarabağın azərbaycanlı və erməni icmaları arasında görüşlərin təşkil olunmasının zəruriliyi də vurğulanmışdır.

Görüşdə digər regional məsələlər ətrafında da fikir mübadiləsi aparılmışdır.

Xəbər lenti

Xəbər lenti