Avqustun 10-da Vətəndaş Həmrəyliyi Partiyasının qərargahında planlaşdırılan iqtidar-müxalifət partiyalarının görüşündə iqtidar tərəfi iştirak etməyəcək. Ana Vətən Partiyasının sədri Fəzail Ağamalı Trend ə bildirib ki, onun həmin görüşdə iştirak etmək fikri yoxdur.
O, artıq bu barədə VHP-yə rəsmi cavab göndərib. "Vətəndaş Həmrəyliyi Partiyasına cavab məktubumda dəvətə görə təşəkkürümü bildirdim, lakin Azərbaycan Xalq Cəbhəsi Partiyasının Ermənistanın hüquq-mühafizə orqanları ilə əlaqələrinin ortaya çıxdığına, dövlətçilik maraqlarımıza xəyanət etdiyinə görə onunla bir masa arxasında oturmağı düzgün hesab etmirəm. Ona görə də VHP-də keçirilən görüşdə şəxsən mən iştirak etməyəcəm"-deyə F.Ağamalı bildirib.
Sosial Rifah Partiyasının sədri Xanhüseyn Kazımlı da bildirib ki, eyni səbəb üzündən görüşə qatılmayacağı barədə Sabir Rüstəmxanlıya məlumat verib. "Mən bildirdim ki, ermənilərlə əməkdaşlığa gedən bir qurumun himayədarı olan AXCP həmin görüşdə təmsil olunacaqsa, biz orada iştirak etməyəcəyik.
Partiyamızın Ali Məclisi qərar qəbul edib ki, tarixi düşmənlərimizlə əməkdaşlıq etmək siyasi eybəcərlikdir və buna gedən bir partiya ilə üz-üzə oturub danışıq aparmaq istəmirik. Amma bizə VHP-dən rəsmi cavab verilsə ki, AXCP görüşdə iştirak etmir, onda dəvəti müzakirə edib qərar verəcəyik"-deyə X.Kazımlı əlavə edib.
"Azadlıq" blokuna daxil olan partiyalar isə iqtidar tərəfinin ittihamları ilə razılaşmır. ADP sədrinin birinci müavini Sərdar Cəlaloğlu bildirib ki, hələ məhkəmə qərarı ilə günahı sübuta yetirilməmiş bir nəfər gəncin əməllərini bəhanə edib müxalifətlə dialoqdan imtina etmək bu danışıqların oyun olduğunu göstərir. "Hacı Məmmədov kimi cinayətkarı dövlət orqanlarında yetişdirib çoxsaylı cinayət əməlləri törətməsinə şərait yaradılıb.
Onda gərək Daxili İşlər Nazirliyinin rəhbərliyi həbs olunaydı. İqtidar-müxalifət partiyalarının görüşü ilə bağlı əvvəldən də bildirmişdik ki, iqtidar tərəfindən iştirak edən şəxslərin heç bir səlahiyyətləri yoxdur və bu görüşlər nəticəsiz qalır. İndi iqtidar tərəfinin görüşdən imtina barədə bəyanatı da bu dialoqun əvvəldən qeyri-ciddi və oyunbazlıq olduğunu nümayiş etdirir"-deyə S.Cəlaloğlu bildirib.