Azərbaycan, Bakı / Trend , müxbir İ.Əlizadə/ Hakim Yeni Azərbaycan Partiyasının (YAP) təşəbbüsü ilə eks-prezident Heydər Əliyevin anadan olmasının 84-cü ildönümü münasibətilə silsilə tədbirlər keçirilməsi nəzərdə tutulub. Bu barədə çərşənbə axşamı Bakıda YAP icra katibi, millət vəkili Əli Əhmədov məlumat verib.
Onun sözlərinə görə, eks-prezidentin doğum günü münasibətilə YAP mayın 7-də "Gülüstan" sarayında böyük elmi-praktik konfrans keçirəcək.
Tədbirlə əlaqədar konfransın materiallarından ibarət böyük həcmdə toplu çap olunub. "Ad günü tədbirləri silsiləsinə daxil olan əhəmiyyətli işlərimizdən biri gənclər arasında, xüsusilə də YAP-ın gəncləri arasında minifutbol turnirinin keçirilməsidir" - deyə YAP rəsmisi əlavə edib.
Onun sözlərinə görə, bu turnirə artıq start verilib, mayın 7-də turnirin son oyunu olacaq: "Bu turnirdə hələlik bu il Bakı şəhərinin 11 rayonunun təmsilçiləri iştirak edirlər. Güman edirəm ki, gələn il respublikanın bütün rayonlarının təmsilçiləri iştirak edəcəklər".
İcra katibinin sözlərinə görə, YAP-ın bütün rayon və şəhər təşkilatlarında da eks-prezidentin doğum günü ilə bağlı tədbirlər keçirilir.
YAP 1992-ci ildə Naxçıvanda yaradılıb. 14 ildir ki, hakim partiya olan YAP-ın ilk sədri mərhum eks-prezident Heydər Əliyev olub. Partiyanın hazırkı sədri prezident İlham Əliyevdir.
