Azərbaycan, Bakı, 28 yanvar/ Trend müxbir E.Hüseynli/ Azərbaycada ayın sonunda hava şəraitinin qeyri-sabit keçəcəyi barədə Milli Hidrometeorologiya Departamenti dövlət strukturlarına xəbərdarlıq göndərib. Ekologiya və Təbii Sərvətlər Nazirliyinin (ETSN) Milli Hidrometeorologiya Departamentinin direktor müavini Umayra Tağıyeva bazar ertəsi Trend ə bildirib ki, sabahdan qərb rayonlarından başlayaraq fevralın 1-dək Azərbaycan ərazisində qeyri-sabit hava şəraiti hökm sürəcək.
Yanvarın ilk 15 günündə Azərbaycan ərazisində anomal şaxtalar qeydə alınıb. Paytaxt Bakı və Abşeron yarımadasında rekord mənfi temperatur qeydə alınıb. Həmin müddətdə paytaxtda gecə 8-9 dərəcə şaxta qeydə alınıb. Azərbaycan ərazisinə düşən qar isə 3 aylıq normaya bərabər olub. Bununla bağlı departament dövlət qurumlarına xəbərdarlıq göndərmişdi.
Tağıyeva deyib ki, yanvarın 29-da ölkənin qərb rayonlarında (Gəncə, Şəmkir, Tovuz, Ağstafa, Qazax) güclü şimal küləyi əsəcək, qar və sulu qar yağacaq. Bakı və Abşeron yarımadasında isə qeyri-sabit hava şəraiti yanvarın 30-u axşamdan başlayacaq. Hesabat dövründə temperatur 5-7 dərəcə düşəcək.
