Azərbaycan, Bakı, 16 sentyabr / Trend , K.Zərbalıyeva/ Azərbaycanda narkotiklərin qanunsuz dövriyyəsində ittiham olunan Bakının sabiq prokuroru Ədalət Mirsalamovun, Əzizbəyov rayonunun sabiq prokuroru Rəşid Həsənovun və xalq artisti İlhamə Quliyevanın övladlarının da daxil olduğu 17 nəfərlik dəstənin cinayət işi gələn həftə baxılması üçün məhkəməyə göndəriləcək.
Bu barədə Trend -a vəkil Seyfəddin Əliyev məlumat verib.
Vəkil bildirib ki, istintaq başa çatıb və vəkillər, təqsirləndirilənlər cinayət işinin materialları ilə tanışlığa başlayıb.
Mirsalamovun oğlu Mahir Mirsalamov və Rəşad Həsənovun oğlu Yalçın Həsənov, İlhamə Quliyevanın oğlu Orxan Nadirov və digərləri bu ilin mayında narkotik vasitələrin satışı ilə məşğul olduqları üçün Milli Təhlükəsizlik Nazirliyinin keçirdiyi əməliyyat zamanı saxlanılıblar və barələrində həbs qətimkan tədbiri seçilib. Dəstə üzvləri arasında polis əməkdaşlarının da olduğu bildirilir.
Onların narkotik vasitə olan ekstazın qanunsuz dövriyyəsində günahlandırıldığı bildirilir.
Həbs olunmuş dəstə üzvləri MTN-in İstintaq Təcridxanasında saxlanılırlar.
Müəlliflə əlaqə saxlamaq üçün elektron ünvan- [email protected]
