Azərbaycan, Bakı, 17 dekabr / Trend , müxbir A. Hüseynbala/ Azərbaycanda fəaliyyəti dayandırılan "Barmek-Azərbaycan Elektrik Şəbəkəsi" MMC-nin prezidentinin Türkiyəyə getməsi ilə bağlı qadağa hələ də qüvvəsində qalır.
"Şirkətin fəaliyyəti dayandıralandan sonra Azərbaycanda da heç bir işlə məşğul olmuram. Türkiyədəki şirkətlərimin fəaliyyətinə İnternet vasitəsilə nəzarət edirəm", - çərşənbə günü Trend - a "Barmek" MMC-nin prezidenti Hüseyn Arabul bildirib.
Trend - un arayışı: 2007-ci ildə Ağır Cinayətlərə Dair İşlər üzrə Məhkəmənin qərarı ilə "Barmek-Azərbaycan Elektrik Şəbəkəsi" MMC-nin prezidenti Hüseyn Arabul və şirkətin digər 7 əməkdaşı müxtəlif müddətə şərti olaraq azadlıqdan məhrum ediliblər.
İstintaqla müəyyən edilib ki, İqtisadi İnkişaf Nazirliyi ilə Türkiyənin "Barmek Holdinq A.Ş" şirkəti arasında bağlanmış müqaviləyə əsasən, "Bakıelektrikşəbəkə" ASC-nin idarə edilməsi hüququ 25 il müddətinə həmin şirkətə verilib. Müqavilə ilə nəzərdə tutulmuş investisiya proqramına əsasən, şirkət tərəfindən ilk 5 il ərzində 51 milyon dollar isərmayə qoyuluşu nəzərdə tutulsa da, "Barmek" şirkəti tərəfindən heç bir sərmayə qoyulmamış, nəzərdə tutulduğundan xeyli az olan sərmayə müəyyənləşməsi isə, bütövlükdə "Barmek"in istehlakçılar hesabına həyata keçirilib.
İstintaq onu da müəyyən edib ki, "Barmek" MMC-nin əməkdaşları tərəfindən elektrik enerjisini istifadəyə görə istehlakçılardan toplanmış külli miqdarda vəsait -- 9 milyon 143 min 940 AZN özgə əmlakı mənimsəmə və ya israf etmə yolu ilə talan edilib.
Şirkətin prezidenti Arabul Cinayət Məcəlləsinin 179.3.2 (mənimsəmə və ya israf etmə), 308.2 (vəzifə səlahiyyətlərindən sui-istifadə) və 313- cü (vəzifə saxtakarlığı) maddələri ilə ittiham elan olunub və barəsində başqa yerə getməmək haqqında iltizam qətiimkan tədbiri seçilib.
"Barmek"in əməkdaşları, vitse - prezident Ömər Günər İsmayıl, texniki departamentin direktoru Vəfa Ağayev, texniki əməliyyat departamentinin direktor əvəzi Mahir Novruzov, sabiq baş menecer Çingiz İbadov və maliyyə departamentinin rəisi Valeh Zeynalov, yüksək gərginlikli elektrik şəbəkələrinin istismarı idarəsinin rəisi Çingiz Abdullayev, rele - mühafizə xidmətinin rəisi Əsgər Əsgərzadə CM-nin 179.3.2, 308.2 və 313-cü maddələri ilə təqsirləndirilən şəxs qismində cəlb edilərək, barələrində həbs və digər qətimkan tədbirləri seçilib.
Arabulun sözlərinə görə, Ağır Cinayətlərə Dair İşlər Üzrə Məhkəmənin onun və şirkətin daha 7 əməkdaşı barəsində çıxardığı hökmdən digər məhkəmə instansiyalarına şikayətlərinin heç biri təmin olunmayıb.
"Cəzamı Azərbaycanda çəkmək məcburiyyətindəyəm. Türkiyəyə getmək üçün indiyədək Azərbaycanın heç bir hakimiyyət strukturuna müraciət etməmişəm", - Arabul əlavə edib.
Azərbaycandakı fəaliyyəti ilə bağlı yazdığı "6 il Azərbaycanda" kitabının nəşrinə gəldikdə, Arabul bunu Türkiyəyə qayıdandan sonra reallaşdıracağını qeyd edib.
"Barmek"in prezidenti və şirkətin daha 7 əməkdaşı ilə bağlı Ağır Cinayətlərə Dair İşlər üzrə Məhkəmənin qərarından apellyasiya şikayətinə artıq baxılıb və hökmlər qüvvədə saxlanılıb", - çərşənbə günü Trend -a Arabulun hüquqlarını müdafiə edən Abbas Atakişi bildirib.
Onun sözlərinə görə, indi Apellyasiya Məhkəməsinin qərarından kassasiya şikayəti veriləcək.
Şirkət prezidentinin beynəlxalq məhkəməyə göndərdiyi iddiaya gəldikdə, vəkil deyib ki, proses davam edir: "Bu məhkəmənin öz prosedurları var və iddiaya baxış mərhələ - mərhələ aparılır", - Atakişi vurğulayıb.
Məqalə müəllifi ilə əlaqə ünvanı: [email protected]
