Azərbaycan, Bakı, 26 dekabr / Trend , müxbir K. Zərbalıyeva/ Bakı Apellyasiya Məhkəməsi Avropa Məhkəməsinin Azərbaycana qarşı qərar qəbul etdiyi işə mahiyyəti üzrə baxmaqdan imtina edib.
Bakı Apellyasiya Məhkəməsinin cümə günü keçirilən iclasında Jurnalist Araşdırmaları Mərkəzinin təsisçilərindən biri Şeyda Nəsiblinin Ədliyyə Nazirliyinə qarşı iddiası üzrə Yasamal rayon məhkəməsinin 10 fevral 2003-cü il tarixli qətnaməsindən verilən şikayət üzrə icraata xitam verilməsi barədə qərardad çıxarılıb.
Məhkəmədən Trend -a verilən məlumata görə, Nəsiblinin təsisçisi olduğu təşkilat dövlət qeydiyyatına alındığınıdan işə mahiyyəti üzrə baxılması məqsədəuyğun hesab olunmayıb.
Trend -un arayışı: Azərbaycan Hökuməti 2004-cü ilin iyununda mülki və cinayət prosessual və digər qanunvericilik aktlarına müvafiq dəyişikliklər edib. Belə ki, Mülki Prosessual Məcəlləyə (431-1-ci maddə) və Cinayət Prosessual Məcəlləsinə (455-ci maddəsi) əsasən, qanuni qüvvəyə minmiş məhkəmə aktlarına hüquq və azadlıqların pozulması ilə bağlı yeni hallar üzrə yenidən baxıla bilər. Bu əsaslardan biri də Avropa İnsan Hüquqları Məhkəməsinin ölkə məhkəmələri tərəfindən işlərə baxılarkən Avropa Konvensiyasının müddəalarını pozduğunu müəyyən etməsi halıdır.
Noyabrın 3-də Ali Məhkəmənin Plenumunun
qərarı əsasında Şeyda Nəsiblinin
Ədliyyə Nazirliyinə qarşı iddiası üzrə
bütün məhkəmə qərarları ləğv
edilib və iş yeni hal üzrə baxılması
üçün Apellyasiya Məhkəməsinə
göndərilib.
Avropa Məhkəməsi Şeyda Nəsibovanın
ərizəsi üzrə 18 oktyabr 2007-ci ildə qərar
qəbul edib. Məhkəmə Ərizəçinin
Konvensiyanın 11-ci maddəsi ilə təminat verilən
birləşmək hüququnun pozuntusunu tanıyıb və
mənəvi ziyanın əvəzi kimi ona 1000 avro,
məhkəmə xərclərinin əvəzi kimi 2000 avro
məbləğində kompensasiya müəyyən edib.
Nəsiblinin nümayəndəsi, hüquqşünas
İntiqam Əliyev Trend -a bildirib ki, işə mahiyyəti
üzrə baxılmalı və qətnamə qəbul
olunmalı idi.
Əliyev məhkəmənin bu hərəkətini Avropa Şurasının Nazirlər Kabinetini aldatmaq kimi qiymətləndirib.
"Ali Məhkəmənin Plenumu Yasamal rayon məhkəməsinin qətnaməsini ləğv edib və işə yenidən baxılması üçün Apellyasiya Məhkəməsinə göndərib. Apellyasiya Məhkəməsi isə əsassız olaraq icraata xitam verib",-deyə hüquqşünas vurğulayıb.
Məqalə müəllifi ilə əlaqə ünvanı:[email protected]