Azərbaycan, Bakı, 12 iyun / Trend , müxbir H.Bağırov /
Azərbaycanın Qiymətli Kağızlar üzrə Dövlət Komitəsi yanında Milli Depozit Mərkəzinin əməkdaşının məhkəməsi başlayıb.
Ağır Cinayətlərə Dair İşlər üzrə Məhkəmədən cümə günü Trend -a verilən məlumata görə, mərkəzin deponentləşdirmə şöbəsinin rəisi Cavanşir Hacıyev ifadə verib və elan olunmuş ittiham üzrə özünü təqsirli bilməyib.
O, bildirib ki, dövlət özəlləşdirmə çeklərinin çatışmazlığı barədə onda məlumat olub. Onun sözlərinə görə, həmin çatışmazlıq barəsində rəhbərliyə müraciət edib və rəhbərlik də yoxlamalara başlayıb.
Hacıyev deyib ki, rəhbərlik tərəfindən aparılan yoxlama nəticəsində dövlət özəlləşdirmə çeklərinin çatışmazlığı aşkar edilib və araşdırmalar aparılıb.
"Nəticədə də məni tutdular. Amma bu çatışmazlıqla bağlı heç bir günahım olmayıb", - təqsirləndirilən bildirib.
Məhkəmə prosesi iyunun 19-da davam etdiriləcək.
Hacıyev Cinayət Məcəlləsinin külli miqdarda ziyan vurmaqla mənimsəmə və ya israf etmə (179.3.2-ci) maddəsi ilə ittiham olunur.
Baş Prokurorluq yanında Korrupsiyaya Qarşı Mübarizə İdarəsinin Qiymətli Kağızlar üzrə Dövlət Komitəsi ilə birgə apardığı araşdırma zamanı müəyyən edilib ki, Hacıyev 2006-cı ilin iyun ayından 2009-cu ilin fevral ayınadək olan müddət ərzində qulluq mövqeyindən istifadə edərək, ona etibar edilmiş deponentləşdirmə şöbəsinin xəzinəsində saxlanılan 861.973,9 manat dəyərində, yəni 193702 ədəd dövlət özəlləşdirmə çekini (48.425,5 ədəd dövlət özəlləşdirmə payını) mənimsəyərək talayıb. Həmin fakt üzrə 05 mart 2009-cu il tarixdə başlanılmış cinayət işi üzrə Hacıyev barəsində araşdırma aparılıb və o, həbs edilib.
Məqalə müəllifi ilə əlaqə ünvanı: [email protected]
