Azərbaycan, Bakı, 22 oktyabr / Trend , müxbir K.Zərbalıyeva/
Azərbaycanda dövlət qulluğundakı 224 vakant vəzifənin tutulması üçün müsahibə elan edilib.
Azərbaycan Respublikasının Prezidenti yanında Dövlət Qulluğu Məsələləri üzrə Komissiyanın mətbuat xidmətindən cümə axşamı Trend -a verilən məlumata görə, oktyabrın 23-dən 25-dək dövlət orqanında inzibati vəzifələrin altıncı-doqquzuncu təsnifatlarına uyğun olan 224 vakant dövlət qulluğu vəzifəsinin tutulması üçün müsahibə başlanıb.
Müsahibəyə çıxarılan 224 vakant vəzifənin 67-si inzibati vəzifələrin altıncı təsnifatına, 19-u yeddinci təsnifatına, 23-ü səkkizinci, 115-i isə doqquzuncu təsnifatına aiddir.
Müsahibəyə ən çox vakant vəzifə təqdim edən dövlət orqanları Əmlak Məsələləri Dövlət Komitəsi (38 vakant vəzifə) və Əmək və Əhalinin Sosial Müdafiəsi Nazirliyidir (35 vakant vəzifə).
Vakant dövlət qulluğu vəzifələrinin tutulmasında həmin dövlət orqanında və ya digər dövlət orqanında həmin inzibati vəzifənin təsnifatından ən çoxu iki təsnifat aşağı inzibati vəzifələrdə çalışan dövlət qulluqçuları (qeyd edilən şəxslərin inzibati vəzifələrə uyğun ixtisas dərəcəsi olmalıdır) və azı 5 il qulluq stajı olan və dövlət orqanında həmin vəzifənin təsnifatından ən çoxu iki təsnifat aşağı inzibati vəzifələrdə çalışmış şəxslər iştirak edə bilərlər.
Müsahibədə iştirak etmək arzusunda olanlar sənədlərini 20 gün müddətində Komissiyaya şəxsən və ya poçtla təqdim etməlidirlər.
Məqalə müəllifi ilə əlaqə ünvanı: [email protected]