Qazaxıstan, Astana, 18 noyabr /Trend, müxbir A.Maratov/
Aktobe şəhərində ilk dəfə olaraq 15 yaşlı qıza donuzun ürək qapağının köçürülməsi üzrə nadir əməliyyat aparılıb. Bu barədə Qazaxıstanın "7-ci kanal" telekanalı məlumat verib.
"Yerli həkimlər Çexiyadan olan ürək cərrahlarının dəqiq rəhbərliyi altında işləyiblər. Hələ bir neçə il əvvəl onlar donuz orqanlarının insana köçürülməsi kimi əməliyyatı heç təsəvvürlərinə belə gətirə bilməzdilər: özü də ürək qapağı kimi bu cür çox mürəkkəb və ağır zəhmət tələb edən əməliyyatı", - "7-ci kanal" şərh edib.
Dünyada belə təcrübənin mövcud olmasına baxmayaraq, Aktobedə həkimlər donuzun ürək qapağını ilk dəfədir ki, insana köçürürlər. Tibb işçiləri əvvəlcədən öz uğurlarına əmin idilər. Qərbdə hər beş ürək xəstəsindən biri bioloji protezə üstünlük verir.
Çexiyalı cərrahlar Aktobedə daha doqquz əməliyyat aparacaqlar. İmplantın qiyməti 700 min tengedir (4,7 min dollara yaxın). Aktobedə dövlət sifarişi çərçivəsində artıq 30 bioloji protez alınıb.
Telekanalın məlumatına görə, hələlik əməliyyat yalnız kvota üzrə aparılır. Prioritet qrupda yaşlı insanlar və uşaq doğa bilən yaşda qadınlardır. Lakin həkimlər deyirlər ki, bioloji protezlər hətta azyaşlı körpələr üçün də zərərsizdir. Amma onları hər 15 ildən bir dəyişmək lazımdır.
