Azərbaycan, Bakı, 10 yanvar /Trend, müxbir K.Zərbalıyeva/
Azərbaycanda milli və beynəlxalq səviyyədə övladlığagötürmə ilə bağlı vahid koordinasiyanı həyata keçirən qurumun yaradılmasına ehtiyac yoxdur. Bunu Trend-ə Milli Məclisin Sosial siyasət komitəsinin sədr müavini Musa Quliyev deyib.
Azərbaycan ombudsmanı Elmira Süleymanova milli və beynəlxalq səviyyədə övladlığagötürmə ilə bağlı vahid koordinasiyanı həyata keçirən qurumun yaradılması təklifi ilə çıxış etmişdi. Ombudsman bununla əlaqədar milli qanunvericiliyin təkmilləşdirilməsini zəruri sayıb.
Komitə sədri hesab edir ki, Azərbaycanda övladlığagötürmə ilə bağlı problem yoxdur və bu proses qanunvericiliyin tələblərinə uyğun həyata keçirilir.
"Bu sahədə yeni bir qurumun yaradılmasına, yaxud bu səlahiyyətlərin hər hansı bir quruma verilməsinə ehtiyac yoxdur. Övladlığagötürmə barədə qərarı məhkəmə verir", - komitə sədri deyib.
Azərbaycanda 3 yaşınadək uşaqların övladlığa verilməsi Səhiyyə Nazirliyi, 3 yaşdan 18 yaşadək uşaqların övladlığa verilməsi isə Təhsil Nazirliyinin təqdim etdiyi siyahılar əsasında məhkəmələr tərəfindən həyata keçirilir.
Azərbaycan vətəndaşı olan uşaqların əcnəbilər və ya vətəndaşlığı olmayan şəxslər tərəfindən övladlığa götürülməsinə Ailə, Qadın və Uşaq Problemləri üzrə Dövlət Komitəsinin razılığı əsasında yol verilir.
Quliyev bildirib ki, bu səlahiyyət vahid quruma həvalə olunsa belə, övladlığagötürmə ilə bağlı qərar qəbul edilərkən əlaqədar qurumların rəyləri nəzərə alınmalıdır.
"Azərbaycanda övladlığagötürmə ilə bağlı mexanizm normal işləyir və bu mexanizmin dəyişdirilməsinə ehtiyac yoxdur", - Quliyev deyib.
Millət vəkili bildirib ki, bu sahədə vahid qurumun yaradılması qanunverici orqanın səlahiyyətində deyil. Onun sözlərinə görə, bunun üçün Nazirlər Kabinetinin qərarı tələb olunur.
Ailə, Qadın və Uşaq Problemləri üzrə Dövlət Komitəsinin ölkələrarası övladlığagötürmə sektorunun rəhbəri Vəsilə Möhsümova ombudsmanın təklifinin tərəfdarıdır.
Sektor müdiri bildirib ki,ombudsmanın təklifi gələcəkdə müzakirə oluna bilər.