Azərbaycan, Bakı, 18 yanvar /Trend, müxbir M.Əliyev/
AFFA (Azərbaycan Futbol Federasiyaları Assosiasiyası) 2011-ci ildə Azərbaycan futbolunun 100 illik yubileyi ilə əlaqədar tədbirlər planı hazırlayıb. Bu barədə çərşənbə axşamı AFFA-dan Trend-ə verilən məlumatda deyilir.
AFFA-nın prezidenti Rövnəq Abdullayevin tapşırığına əsasən, yubiley çərçivəsində müxtəlif tədbirlərin keçirilməsi nəzərdə tutulub.
Tədbirlər planına əsasən, Azərbaycan futbolunun 100 illik yubileyinə həsr olunmuş təntənəli mərasim iyun ayında Buta Sarayında keçiriləcək. Tədbirdə beynəlxalq futbol qurumlarının, həmiçinin milli assosiasiyaların nümayəndələrinin və digər qonaqların iştirakı gözlənilir.
AFFA tərəfindən Dövlət Arxivinə müraciət olunaraq, futbolumuzun 100 illik tarixi barədə yazı, foto və videomateriallar toplanıb.