Azərbaycan, Bakı, 16 fevral /Trend, müxbir İ.İsabalayeva/
Xəzərin Abşeron sahili boyunca balıqqulaqlarının daşınması nəticəsində sahil xətti quruya doğru hərəkət edib.
Bunu cümə axşamı Trend-ə Bakı Dövlət Universitetinin Xəzər Elmi Tədqiqat və İnkişaf Mərkəzinin rəhbəri, çoğrafiya elmlər doktoru Çingiz İsmayılov deyib.
Onun sözlərinə görə, dənizin sahil xəttinin quruya tərəf çəkilməsi insan amilinin nəticəsidir.
"10-15 il əvvəl olan sahil xətləri indi artıq Abşeronda yoxdur. Çünki əvvəllər Xəzərin Abşeron sahillərində sahil xətti boyunca balıqqulaqları var idi. Həmin balıqqulaqları sahil xəttini mühafizə edirdi. İndi isə sahildə balıqqulaqları demək olar ki, yoxdur. Sahillər indi lilli-qumludur", - İsmayılov əlavə edib.
O deyib ki, məhz bu amil dəniz suyunun quruya doğru hərəkət etməsinə təkan verib.
İsmayılov sahil xəttinin dəyişməsinin Xəzərin suyunun səviyyəsinin yüksəlməsi ilə izah olunmasını düzgün saymayıb.
Mütəxəssisin sözlərinə görə, Xəzərin səviyyəsinin artması bir neçə amildən - qlobal iqlim dəyişikliyindən, Günəşin fəallığından və tektonik proseslərdən asılıdır. Bu məsələdə insan amilinin rolunun olması barədə söylənilənlər isə düzgün deyil. Çünki insan amili dənizin yalnız sahil ərazilərinə təsir edə bilər.
İsmayılov əlavə edib ki, hər 30-35 ildən bir Xəzər dənizinin səviyyəsinin tərəddüdü baş verir. Dənizin suyunun səviyyəsində 30-50 sm arasında enmə və qalxma müşahidə edilir. Sonuncu belə artma 1978-1994-cü illər ərzində olub. Sonrakı illər ərzində qalxma və düşmə müşahidə edilsə də, bu dəyişmə 10-15 sm olub.
Mərkəz rəhbəri yaxın illərdə Xəzər dənizinin suyunun səviyyəsində mühüm dəyişikliyin gözlənilmədiyini də qeyd edib.