Azərbaycan, Bakı, 1 may /Trend, müxbir E.Mehdiyev/
İsveçrədə Azərbaycanda söz və mətbuat azadlığının vəziyyəti ilə bağlı seminar keçiriləcək.
Azərbaycan Mətbuat Şurasından çərşənbə axşamı Trend-ə verilən məlumata görə, Şura sədri Əflatun Amaşov da "Eurovision 2012" öncəsi İsveçrənin Cenevrə şəhərində Azərbaycanda söz və mətbuat azadlığının vəziyyəti ilə bağlı keçiriləcək seminarda iştirak edəcək.
3 may - Ümumdünya Söz Azadlığı Gününə həsr olunmuş tədbir Avropa Yayımları Birliyinin təşəbbüsü ilə baş tutacaq.
Dünyanın nüfuzlu media qurumları və insan hüquqları təşkilatlarının nümayəndələrinin qatılacaqları toplantıda ölkəmizdən də qeyri-hökumət təşkilatlarının təmsilçiləri iştirak edəcəklər. Azərbaycandan tədbirə dövlət rəsmilərinin də qatılmaları nəzərdə tutulur.
Qeyd edək ki, seminarın mayın 2-də Avropa Yayımları Birliyinin Cenevrədəki mənzil-qərargahında keçirilməsi planlaşdırılır.