Azərbaycan, Bakı, 17 aprel /Trend/
Yenidən qurulmuş Hacıqabul-Bəhramtəpə yolu 2014-cü ildə istismara veriləcək.
Nəqliyyat Nazirliyi "Azəryolservis" ASC-dən Trend-ə verilən məlumata görə, ümumi uzunluğu 112,5 km olan Hacıqabul - Bəhramtəpə yolunun yenidən qurulması işləri hazırda davam etdirilir.
İkinci texniki dərəcəli iki hərəkət zolaqlı yolda 5 heyvan keçidi, 1 yerüstü piyada keçidi, 11 yeni körpü, 187 ədəd müxtəlif diamertli borunun tikintisi və 1 körpünün əsaslı təmiri nəzərdə tutulub.
Sözügedən yolun Hacıqabul - Bulaqlı hissəsinə ikiqat asfalt - beton örtük vurulub, Bulaqlı - Bəhramtəpə hissəsinin 20 km-də isə torpaq işləri və ikiqat asfalt - beton örtüyünün vurulması başa çatdırılıb.
Layihə üzrə işlərin 60 faizi yerinə yetirilib. Layihənin bir hissəsinin 2013-cü ildə, ümumilikdə isə 2014-cü ildə tam istismara verilməsi planlaşdırılır.