...

Azərbaycanda avtoxuliqanlara qarşı cəzalar sərtləşdirilib

Cəmiyyət Materials 14 May 2013 16:08 (UTC +04:00)
Trend-in məlumatına görə, bununla bağlı Milli Məclis İnzibati Xətalar Məcəlləsinin 296-1-ci (Avtoxuliqanlıq) maddəsinə dəyişiklik edib.
Azərbaycanda avtoxuliqanlara qarşı cəzalar sərtləşdirilib

Azərbaycan, Bakı, 14 may /Trend, müxbir M.Əliyev/

Azərbaycanda avtoxuliqanlıq edənlərə qarşı cəzalar sərtləşdirilib.

Trend-in məlumatına görə, bununla bağlı Milli Məclis İnzibati Xətalar Məcəlləsinin 296-1-ci (Avtoxuliqanlıq) maddəsinə dəyişiklik edib.

Dəyişikliyə görə, avtoxuliqanlıq, yəni nəqliyyat vasitəsinin sürücüsü tərəfindən ictimai qaydanı və əhalinin dincliyini nümayişkaranə şəkildə pozan, cəmiyyətə açıqca hörmətsizlik ifadə edən, yol hərəkəti qaydalarının müxtəlif üsullarla davamlı olaraq pozulması ilə müşayiət olunan qərəzli hərəkətlərə görə nəqliyyat vasitələrini idarəetmə hüququ bir il müddətinə məhdudlaşdırılmaqla dörd yüz manatdan altı yüz manatadək miqdarda cərimə edilir və ya nəqliyyat vasitələrini idarə etmə hüququ bir il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla 15 gündən bir ayadək (hazırda beş gündən on günədək) inzibati həbs tətbiq olunacaq.

Eyni hərəkətlərin il ərzində inzibati tənbeh almış şəxs tərəfindən təkrar törədilməsinə görə nəqliyyat vasitələrini idarə etmə hüququ iki il müddətinə məhdudlaşdırılmaqla altı yüz manatdan səkkiz yüz manatadək miqdarda cərimə edilir və ya nəqliyyat vasitələrini idarəetmə hüququ iki il müddətinə məhdudlaşdırılmaqla işin hallarına görə, pozuntunu törədənin şəxsiyyəti nəzərə alınmaqla bir aydan iki ayadək (hazırda on gündən on beş günədək) inzibati həbs tətbiq ediləcək.

Xatırladaq ki, müvafiq dəyişiklik layihəsi Milli Məclisə ölkənin Baş prokuroru Zakir Qaralovun imzası ilə daxil olub. Məktubda layihənin Ədliyyə, Daxili İşlər nazirlikləri və Ali Məhkəmə ilə razılaşdırıldığı bildirilib.

Məqalədə:
Xəbər lenti

Xəbər lenti