...

"Tour d’Azerbaïdjan"da ilk gün: "Bora-Argon 18"-dən 4 fəxri kürsü (FOTO)

Cəmiyyət Materials 4 May 2016 15:49 (UTC +04:00)
Bu gün Beynəlxalq Velosipedçilər İttifaqının 2.1 kateqoriyalı "Tour d’Azerbaïdjan-2016" veloyürüşünə start verilib.
"Tour d’Azerbaïdjan"da ilk gün: "Bora-Argon 18"-dən 4 fəxri kürsü (FOTO)

Bakı. Trend:

Bu gün Beynəlxalq Velosipedçilər İttifaqının 2.1 kateqoriyalı "Tour d'Azerbaïdjan-2016" veloyürüşünə start verilib. İlk yarış günü iştirakçılar Dövlət Bayrağı Meydanından start götürməklə Sumqayıt şəhərinədək 154 km məsafə qət ediblər.

Azərbaycan Velosiped İdmanı Federasiyasından Trend-ə verilən məlumata görə, məsafəni hamıdan tez başa vuran Almaniyanın "Bora-Argon 18" peşəkar kontinental komandasının üzvü Fil Bauhaus 3 saat, 34 dəqiqə, 19 saniyə göstərici ilə mərhələ qalibi olub. ABŞ-ın "İlluminate" komandasını üzvü Skott Sanderlend və Birləşmiş Ərəb Əmirliklərinin "Nəsr Dubay" klubunun nümayəndəsi Luka Vakerman müvafiq olaraq 2-ci və 3-cü yeri tutublar. Azərbaycanın "Synergy Baku" komandasının üzvləri Yannis Tamuridis, Maksim Averin, Matey Müqerli, Matiya Kvasina, Kiril Pozdnyakov və Elçin Əsədov da mərhələni ilk pelotonda başa vurublar. Fotofinişə əsasən ən yüksək göstərici Y.Tamuridisə məxsusdur - 5-ci yer.

Mərhələni qalib kimi başa vuran "Bora-Argon 18"in üzvü F.Bauhaus bununla ümumi təsnifatın lideri üçün nəzərdə tutulan mavi rəngli "Synergy Group" köynəyini ələ keçirib. O, həm də ən yaxşı sprinter kimi yaşıl rəngli "SOCAR, eyni zamanda ən yaxşı gənc velosipedçi kimi bənövşəyi rəngli "AtaHolding" köynəyinə sahib çıxıb. Ən yaxşı dağ velosipedçisi kimi qırmızı rəngli "AZAL" köynəyini isə Malayziyanın "Terengganu" klubunun üzvü Saleh Mohd Zamri əldə edib.

Qaliblərə mükafatları veloturun Təşkilat Komitəsinin sədri, Azərbaycan Velosiped İdmanı Federasiyasının vitse-prezidenti Sahib Ələkbərov, Avropa Velosipedçilər Birliyinin vitse-prezidenti Aleksandr Qusyatnikov və Sumqayıt şəhər İcra Hakimiyyətinin başçısı Zakir Fərəcov təqdim ediblər.

"Yürüşə yaxşı başladıq. Komandamız üzərinə düşəni işi gördü. Liderimiz öhdəliyini yerinə yetirdi. Komandamızın iki üzvü də mənə çox yardım etdi. Ümumilikdə yarışın yaxşı keçdiyini söyləyə bilərəm". Bu sözləri ilk mərhələnin qalibi, "Bora-Arqon 18" komandasının üzvü F.Bauhaus deyib.

O, qeyd edib ki, bu peşəkar karyerası ərzində ilk qələbəsidir: "Bu mənim peşəkar səviyyədə ilk uğurumdur. Qalib gəlmək hər zaman xoşdur. Çalışacağam ki, bundan sonra da inamlı çıxışımı davam etdirim. Amma sabahkı gün dağ mərhələsidir. Bu isə sprinterlər üçün əlverişli deyil".

Yarış lideri Azərbaycan haqqında müsbət fikirlər də səsləndirib: "Çox gözəl ölkəniz var. Birinci dəfədir ki, Azərbaycandayam. Buranı çox bəyəndim. Təşkilatçılıq yüksək səviyyədədir. Eləcə də çoxlu sayda azarkeşlərin turu izləməsi müsbət haldır".

Sabah keçiriləcək 2-ci mərhələdə iştirakçılar saat 10:30-da Veloparkdan start götürməklə 186,5 km məsafə qət edəcəklər və İsmayıllıda finiş xəttini keçəcəklər.

Məqalədə:
Xəbər lenti

Xəbər lenti