Bakı. Trend:
Binəqədi rayonunda Binəqədi Rayon İcra Hakimiyyəti, Yeni Azərbaycan Partiyası Binəqədi Rayon Təşkilatı, Binəqədi rayon Gənclər və İdman İdarəsi və 26 saylı Uşaq və Gənclərin Yaradıcılıq Mərkəzinin birgə təşkilatçılığı ilə ümummilli lider Heydər Əliyevin anadan olmasının 93-cü ildönümü münasibətilə Binəqədi rayon orta ümumtəhsil məktəblərinin şagirdlərinin təqdimatında 15 İyun - Milli Qurtuluş Gününə həsr olunmuş "Azərbaycan Səninlədir - Sənsiz deyil" VI yaradıcılıq festivalı keçirilib.
Trend-in məlumatına görə, tədbirdə Binəqədi Rayon İcra Hakimiyyətinin başçısı Xaləddin İsgəndərov, millət vəkilləri Azay Quliyev, Kamaləddin Qafarov, Bakı Şəhər Gənclər və İdman Baş İdarəsinin rəisi Raqif Abbasov, Bakı Şəhəri üzrə Təhsil İdarəsinin müdir müavini Hüseyn Əsgərov, rayon ictimaiyyətinin nümayəndələri, ASAN könüllüləri, müəllimlər və valideynlər iştirak ediblər.
Tədbir iştirakçıları əvvəlcə YAP Binəqədi Rayon Təşkilatının inzibati binası qarşısında yerləşən ümummili liderin abidəsi önünə gül dəstələri qoyaraq xatirəsini ehtiramla yad ediblər.
Tədbirin aparıcıları qonaqları salamladıqdan sonra ansamblın ifasında Dövlət Himni səsləndirildi və festival açıq elan olundu. Laureatların vətənpərvərlik mövzusunda çıxışları, rəqs nümunələri, kompozisiyalar tədbir iştirakçıları tərəfindən böyük maraqla qarşılandı.
İştirakçıların çıxışından sonra laureatlar diplomlarla mükafatlandırıldılar. Mükafatları Bakı Şəhər Gənclər və İdman Baş İdarəsinin rəisi Raqif Abbasov, Bakı Şəhəri üzrə Təhsil İdarəsinin müdir müavini Hüseyn Əsgərov, millət vəkilləri Kamaləddin Qafarov, Azay Quliyev və Rayon İcra Hakimiyyətinin başçısı Xaləddin İsgəndərov təqdim etdilər.
Millət vəkili Azay Quliyev çıxış edərək laureatları təbrik etdi. "15 İyun-Milli Qurtuluş Günü"nün əhəmiyyətindən bəhs edən millət vəkili gənc nəslin vətənə sevgi, məhəbbət hissi ilə tərbiyə edilməsinin vacibliyini vurğuladı.
Rayon İcra Hakimiyyətinin başçısı Xaləddin İsgəndərov çıxış edərək müsabiqə iştirakçılarını təbrik etdi, onların valideynlərinə və müəllimlərinə təşəkkürünü bildirdi. Ümummilli lider Heydər Əliyevin və ölkə başçısının istedadlı və yaradıcı gənclərə olan diqqət və qayğısından söhbət açdı.
Qeyd edək ki, festivalın keçirilməsində əsas məqsəd ümummilli lider Heydər Əliyevin anadan olmasının 93-cü ildönümünün qeyd olunması, ulu öndər Heydər Əliyevin azərbaycançılıq məfkurəsinin yeniyetmələr və gənclər arasında geniş təbliğ edilməsi, yaradıcı gənclərə dövlət qayğısının artırılması, onların istedad və bacarıqlarının inkişaf etdirilməsi üçün şəraitin yaradılmasıdır.
Festival orta ümumtəhsil məktəblərinin, mədəniyyət və yaradıcılıq mərkəzlərinin şagirdləri arasında ədəbi-bədii layihələr üzrə - bədii qiraət, müəllif şeiri, milli rəqs, musiqi (ifaçılıq, çalğı alətləri) - üzrə keçirilib.
Festivalın müsabiqə mərhələsinə 18 fevral 2016-cı il tarixdə start verilib, 05-06 aprel 2016-cı il tarixlərdə isə münsiflər heyəti tərəfindən seçim turu keçirilib. Sonda 140 nəfər şagird yekun konsert proqramında iştirak hüququ qazanıb.
