Bakı. Trend:
Seçkilərdə 8 mindən çox bələdiyyə üzvü seçildi, 4-5 min arası bələdiyyə qulluqçusu var. Amma çox təəssüf ki, bu şəxslərin bu günədək peşə bayramı yoxdur. Yaxşı olardı ki, bələdiyyə qulluqçularının peşə bayramı günü təsis edilsin.
Trend xəbər verir ki, bunu Milli Məclisin deputatı Kamran Bayramov Regional məsələlər komitəsinin bu gün keçirilən iclasında bələdiyyələrin fəaliyyətinə inzibati nəzarəti həyata keçirən orqanın illik məruzəsinin (2024-cü il üzrə) müzakirəsində çıxışı zamanı deyib.
Millət vəkili bildirib ki, bələdiyyələr kifayət qədər böyük kütlədir.
“Peşə bayramının təsis edilməsi onlara da stimul olardı. Həmin günün təsis edilməsi bələdiyyələrin ərazisində bayramla əlaqədar ictimai-kütləvi tədbirlərin keçirilməsinə təkan verərdi, bələdiyyələr ərazilərdə daha çox tanınardı. Ədliyyə Nazirliyi bu sahədə təşəbbüslə çıxış edib müəyyən addımlar ata bilər”, - deyə Kamran Bayramov qeyd edib.