Böyük Britaniyanın Azərbaycandakı səfirliyi korrupsiyaya qarşı mübarizə məqsədilə ölkədə qrant layihəsi həyata keçirir.
Bu haqda layihənin icraçsı Azad İstehlakçılar Birliyinin (AİB) sədri Eyyub Hüseynov Trend ə bildirib. Onun sözlərinə görə, 5700 ABŞ dolları dəyərində olan layihə 6 ay müddətində həyata keçiriləcək.
"İlin sonunadək davam edəcək layihə çərçivəsində "Ayna" qəzetində əhalinin maarifləndirilməsi üçün yazıların dərc olunması, xüsusi broşurların çap olunması, seminar və treninqlərin keçirilməsi planlaşdırılıb",-deyə Eyyub Hüseynov bildirib.
Onun sözlərinə görə, korrupsiya Azərbaycanda ən çox dövlət məmuru- sahibkar arasında özünü büruzə verir. "Bu "əməkdaşlıq" nəticədə ölkəyə mal ixrac edən, həmçinin istehsalla məşğul olan iş adamları ziyan çəkirlər.
Sahibkarlar isə öz növbəsində "yuxarı"lara verdikləri rüşvəti malın maya dəyərinin üzərinə qoyurlar ki, son nəticədə istehlakçı ziyan çəkir",-deyə AİB sədri bildirib.