Azərbaycan, Bakı / Trend müxbir K.Zərbalıyeva/ Qobustan qapalı həbsxanasında aclıq edən məhkumların bir neçəsi də aclığı dayandırıb. Həbsxananın rəisi Əlizadə Hüseynov çərşənbə axşamı Trend ə bildirib ki, müəssisədə 16 məhkum aclığı davam etdirir. Rəis aclıq edən məhkumların səhhətləri ilə bağlı problem olmadığını və onların həkim nəzarətində saxlanıldığını deyib.
Məhkumların qohumları isə bazar ertəsi keçirdikləri mətbuat konfransında ölüm cəzası ömürlük azadlıqdan məhrumetmə ilə əvəzlənmiş bütün məhkumların aclıq elan etdiyini bəyan etmişdilər. Onlar aksiyanın iyunun 18-dən başladığını deyiblər.
Penitensiar Xidmətdən isə həbsxanada aksiyanın iyunun 20-dən başladığı və aclıq edənlər arasında 2000-ci ildən sonra ömürlük azadlıqdan məhrum edilmiş məhkumların da olduğu bildirilib.
Qobustan həbsxanasında ölüm cəzası ömürlüklə əvəzlənmiş 84 məhkum cəza çəkir. Ölüm cəzasının ləğvindən bəri məhkumların sayı 128 nəfər olub.
Məhkumlar hesab edir ki, Azərbaycanda ölüm cəzasının ləğvindən sonra cəzaları ömürlüklə deyil, o zaman Cinayət Məcəlləsində ən ağır cəza olan 15 il azadlıqdan məhrumetmə cəzası ilə əvəzlənməlidir.
İnsan Haqları üzrə Avropa Məhkəməsinin bəzi şikayətlərlə bağlı qərarında qeyd olunub ki, ölümə məhkum olunmuşların cəzalarının ömürlüklə əvəzlənməsi Avropa Konvensiyasının müddəalarına uyğundur. Avropa Məhkəməsi burada bir neçə məqama diqqət yetirib. Qeyd olunub ki, ömürlük azadlıqdan məhrumetmə cəzası bütün hallarda ölüm cəzasından yüngüldür. O, ağır cəza kimi qəbul edilə bilməz.
Məqalə müəllifi ilə əlaqə ünvanı news@trend.az
Bizi Twitter-dən izləyin @trend_az
Trend-in ən mühüm və maraqlı xəbərlərini "Telegram"da izləyin
.jpg)
