Bakı. Maksim Tsurkov - Trend:
Biz məmnunuq ki, Bakıdakı Milli Gimnastika Arenasında məşq etmək imkanımız var.
Bu sözləri Trend-ə batut gimnastikası və tamblinq üzrə Dünya Kubokunda iştirak edəcək CAR milli komandası üzvünün məşqçisi Mendi Zunekind deyib.
Dünya Kubokunun iştirakçıları Azərbaycana gəlməyə başlayıb. CAR və Qazaxıstan milli komandaları artıq Bakıdadır.
M.Zunekindin sözlərinə görə, bu Dünya Kubokunda iştirakın əsas məqsədlərindən biri dünya idman yarışlarına hazırlaşmaqdır.
O deyib: “Bakıda idmançıların məşqi və inkişafı üçün çox gözəl şərait var. Bundan başqa, Dünya kuboku 2017-ci ilin iyulunda Polşada keçiriləcək Dünya oyunlarına hazırlaşmaq üçün gözəl imkandır. Biz məmnunuq ki, buradayıq və məşq etmək imkanımız var. Burada heyrətamiz idman obyektləri var. Bizim ölkəmizdə məşq etməyə kimsə yoxdur, ona görə biz bu gözəl imkandan istifadə edirik”.
M.Zunekind qeyd edib ki, o Bakıya birinci dəfə gəlib. “Bura gözəl insanları olan gözəl şəhərdir və biz burada olmaqdan məmnunuq. Gimnastika arenası sadəcə idealdır. Hava bir az soyuqdur, amma bunun əhəmiyyəti böyük deyil. Ümumilikdə, biz heç bir problem yaşamırıq. Buna görə də Azərbaycan Gimnastika Federasiyasına minnətdarıq. Nəticələrə gəldikdə isə, biz fəxri kürsüdə olmaq istərdik. Fikrimcə, bu mümkündür”.
Qeyd edək ki, Beynəlxalq Gimnastika Federasiyasının yeni Olimpiya dövründə batut gimnastikası və tamblinq üzrə ilk Dünya Kuboku 18 və 19 fevral tarixlərində Bakıda Milli Gimnastika Arenasında baş tutacaq.
15 ölkədən paytaxtımıza təşrif buyuracaq 85 nəfər batutçu və tamblinqçi iki yarış günü ərzində 2017-ci ildə qüvvəyə minən yeni qaydalar əsasında gərgin mübarizə apararaq öz qüvvələrini sınayacaq. Yarışların ilk günü təsnifat mərhələləri, ikinci günü isə final mərhələləri baş tutacaq.
Azərbaycanı batut üzərində fərdi və sinxron proqramda İlya Qrişunin, Oleq Piunov, Ruslan Ağamirov, Svetlana Makştarova, Veronika Zemlyanaya və tamblinq cığırında Mixail Malkin təmsil edəcək.
Azərbaycanda 2013-cü ilin sonundan inkişaf etməyə başlayan batut gimnastikası üzrə Dünya Kuboku Bakıda artıq ikinci dəfədir təşkil olunur. Bu il isə tamblinq üzrə bu qəbildən olan yarışların ölkəmizdə debütüdür. Yüksək səviyyəli təşkilatçılığı ilə hər zaman fərqlənən gimnastika yarışları bu dəfə də bir çox yenilikləri ilə yadda qalacağını vəd edir.
Tamaşaçılar havada pərvazlanan ulduz batutçu və tamblinqçilərin təqdimatında maraqlı mübarizənin şahidi olmaqla yanaşı, əyləncəli müsabiqələr və fleşmoblarda da iştirak edə biləcəklər.
Məşhur kişi batutçular arasında Olimpiya Oyunlarının qızıl medalçısı Vladislav Qonçarov (Belarus), gümüş medalçısı Dmitri Uşakov (Rusiya), dünya çempionatlarının mükafatçıları Sebastyan Martini (Fransa), Andrey Yudin (Rusiya), Mixail Melnik (Rusiya), qadın batutçular arasında Tatyana Petrenya (Belarus) və Anna Kornetskaya (Rusiya) yer alacaq.
Tamblinq cığırında isə kişilər arasında dünya çempionatının gümüş medalçısı Qriqori Noskov (Rusiya), qadınlar arasında Avropa çempionatının qızıl medalçısı Anna Korobeynikova (Rusiya), o cümlədən dünya və Avropa çempionatının gümüş medalçısı Lusi Kolbek (Böyük Britaniya) və digər gimnastlar öz məharətlərini nümayiş etdirəcəklər.
