Bakı. Trend:
COP29 çərçivəsində Trend BİA “COP for Hope” adlı xüsusi layihəni təqdim edir. Bu layihə iqlim dəyişikliyi ilə mübarizədə vahid məqsəd uğrunda birləşmiş dünya liderlərinin, ölkə rəhbərlərinin və müxtəlif sahələrdə – siyasət, iqtisadiyyat, elm və ekologiyada öncül şəxslərin fikirlərini dinləmək üçün unikal imkan yaradır.
Budəfəki müsahibimiz Rusiyadan gələn Şimali Yerli Xalqlara Dəstək Mərkəzinin nümayəndəsi Radun Sulen Ziguadır.
O Trend-ə açıqlamasında bildirib ki, artıq 10-dan çox beynəlxalq, yüksək səviyyəli konfransda iştirak edib.
"Hesab edirəm ki, COP29 onlardan ən üstünüdür", - o deyib.
Bakıda olmaqdan məmnunluğunu ifadə edən nümayəndə COP29-dan gözləntilərinin böyük olduğunu bildirib:
"Bu COP tədbiri, həmçinin, maliyyə COP-u da adlandırıla bilər. Maliyyə yalnız bir alətdir. Ondan bəşəriyyətin prinsipləri və hüquqları yönündə səmərəli istifadə etməliyik.
Biz təbiətimizi, torpağımızı qorumalıyıq və iqlim dəyişikliyinin qarşısını almaq və onunla mübarizə aparmaq üçün ölkələrin razılaşdırdıqları və üzərlərinə götürdükləri hər cür öhdəliklərə əməl olunmalıdır. Amma təbii ki, biz nə istəyirik, biz üzv dövlətlərin bütün siyasi iradəsini istəyirik".
10-dan çox beynəlxalq, yüksək səviyyəli konfranslarda iştirak etdiyini deyən R.S Zigua COP29 onlardan ən üstünü adlandırıb.
O, burada olduqca əhəmiyyətli hadisələrin baş verməsi səbəbindən Bakının gəzməli-görməli yerlərini hələ ziyarət edə bilmədiyini söyləyib:
"O qədər də çox vaxt olmadığından Bakını gəzə bilməmişəm. Çünki olduqca əhmiyyətli hadisələr və birgə qərarlar baş verir. Amma çox istərdim ki, buranın xüsusən də tarixi yerlərinə səfər edim".
Qeyd edək ki, dünən BMT-nin İqlim Dəyişikliyi üzrə Çərçivə Konvensiyasının (COP29) Tərəflər Konfransının 29-cu sessiyasının açılışı olub. Noyabrın 22-dək Bakı Stadionunda keçiriləcək COP29 Azərbaycanın bu günədək təşkil etdiyi ən nəhəng tədbirdir və regionda ilk dəfə Azərbaycanda baş tutur.
COP29 çərçivəsində ən yüksək səviyyəli tədbir – Dünya Liderlərinin İqlim Fəaliyyəti Sammiti noyabrın 12-13-də təşkil olunacaq.
COP29-dan əsas gözlənti iqlim maliyyəsi ilə bağlı ədalətli və ambisiyalı Yeni Kollektiv Kəmiyyət Hədəfinin (NCQG) razılaşdırılmasından ibarətdir.
COP29 Sədrliyi tərəfindən iqlim fəaliyyəti ilə dayanıqlı inkişaf məqsədləri arasında əlaqəni ehtiva edən, yaşıl enerji dəhlizləri, yaşıl enerji saxlancları, iqlim dayanıqlılığı üçün harmoniya, təmiz hidrogen, orqanik tullantılarda metanın azaldılması, yaşıl rəqəmsal fəaliyyət və digər mövzuları əhatə edən 14 təşəbbüs irəli sürülüb.
İqlim maliyyəsinin yaradılması fəaliyyət üçün şərait yaradan əsas prioritet olmaqla yanaşı, hamını bir araya gətirməklə 1,5°C öhdəliyinin yerinə yetirilməsinə töhfə verəcək.