Bakı. Trend:
Azərbaycan və Orta Asiya ölkələri yeni karbohidrogen yataqlarının birgə işlənməsi üçün səylərini birləşdirə bilərlər ki, bu da investisiya qoyuluşu və qabaqcıl texnologiyaların tətbiqi üçün əlavə imkanlar açacaq.
Bunu Trend-ə Özbəkistandan olan tarix elmləri doktoru, professor Ranoxon Tursunova Mərkəzi Asiya və Azərbaycan dövlət başçılarının keçiriləcək Yeddinci Məşvərət Görüşündən əvvəl əməkdaşlıq perspektivlərini şərh edərkən bildirib.
Onun sözlərinə görə, Azərbaycanın neft və qaz yataqlarının işlənməsi və istismarı sahəsindəki təcrübəsi istehsalın səmərəliliyini artırmaq və öz resurs bazalarını genişləndirmək istəyən Qazaxıstan və Türkmənistan üçün son dərəcə faydalı ola bilər.
Professor həmçinin, qarşıdan gələn sammitin tərəfdaşlığı yeni səviyyəyə qaldırmaq və onu sistemli hala gətirmək potensialına malik olduğunu vurğulayıb.
"Qarşılıqlı faydalı layihələrin inkişafı region ölkələrinə qlobal çağırışlara daha effektiv cavab verməyə və yeni inteqrasiya təşəbbüslərinin həyata keçirilməsi üçün zəmin yaratmağa imkan verəcək", - o deyib.
Tursunovanın sözlərinə görə, liderlərin görüşü müntəzəm siyasi məsləhətləşmələr və hökumətlər arasında davamlı kommunikasiya kanallarının inkişafı üçün təməl ola bilər ki, bu da birgə qərar qəbuletmə prosesini sürətləndirəcək.
O həmçinin bildirib ki, siyasi baxımdan sammit aktual regional və beynəlxalq məsələlərə yanaşmaların əlaqələndirilməsinə imkan verəcək. O qeyd edib ki, Mərkəzi Asiya və Cənubi Qafqaz təhlükəsizlik, siyasi sabitlik və xarici siyasətdə oxşar maraqlara malikdir və bu da dialoqu xüsusilə aktual edir.
Professorun sözlərinə görə, bundan əlavə, liderlər xarici iqtisadi siyasət məsələlərini, eləcə də ŞƏT, Türk Dövlətləri Təşkilatı və digər regional strukturlar da daxil olmaqla beynəlxalq təşkilatlar və çoxtərəfli formatlar çərçivəsində əməkdaşlığın gücləndirilməsini müzakirə edə biləcəklər.
"Mərkəzi Asiya və Azərbaycan liderlərinin qarşıdan gələn görüşü regionlararası əməkdaşlığın inkişafında mühüm mərhələ olacaq. Sammit enerji, nəqliyyat, təhlükəsizlik, təhsil və mədəniyyət kimi sahələrdə əməkdaşlığa yeni təkan vermək, eləcə də ölkələr arasında etimad mühitini gücləndirmək potensialına malikdir", - o əlavə edib.