Azərbaycan, Bakı / Trend müxbir S.Babayeva/ Azərbaycanın iri metallurgiya müəssisəsi olan "Baku Steel Company" (BSC) 2007-ci ildə potensial istehsal imkanlarını 350 min ton olmaqla 200 min ton məhsul istehsal etməyi planlaşdırır. Bu barədə bazar ertəsi şirkətin vitse-prezidenti Əli Əsgəri məlumat verib.
Zavodun layihə gücü müəssisəyə hər gün 1,4 min ton metal xammalın gətirilməsini nəzərdə tutur, lakin hazırda bu səviyyə min tonu ötmür. Metal xammalın çatışmazlığı bu il dəfələrlə "Baku Steel Company"nin işinin dayanmasına səbəb olub.
Əsgərinin sözlərinə görə, ilin sonuna qədər müəssisənin işinin dayanacağı gözlənilmir. Xammal zavoda kifayət qədər olmayan həcmdə, lakin normal rejimdə daxil olur.
Onun sözlərinə görə, hazırda müəssisəyə keyfiyyəti heç də yüksək olmayan xammal daxil olur. "Metal xammalın təmizlənməsinə çox vaxt sərf olunur" - deyə Əsgəri qeyd edib.
"Baku Steel Company" Azərbaycanda artan tələbatla əlaqədar olaraq öz məhsulunu əsasən daxili bazarda reallaşdırır. Şirkətin yerli bazarda payı 85% təşkil edir. Az həcmdə məhsul Rusiya və Əfqanıstana göndərilir.
