Azərbaycan, Bakı / Trend müxbir S.Babayeva/ "Baku Steel Company" (BSC) şirkətindən bazar ertəsi verilən məlumata görə, Azərbaycanın iri metallurgiya müəssisəsi olan şirkət İrana ixracın bərpa edilməsi imkanlarını nəzərdən keçirir. İrana ixrac iki il bundan əvvəl yerli bazarda şirkətin istehsal etdiyi məhsullara tələbatın artması ilə əlaqədar olaraq dayandırılıb.
"Bu gün bizim məhsulu İrana satmaq üçün real imkanlarımız var" - deyə BSC-dən bildiriblər.
Şirkətdən bildiriblər ki, İrana ixracın bərpa edilməsi imkanları son aylar ərzində müəssisəyə o qədər də böyük olmayan həcmdə xammalın daxil olması və yerli tələbatın azalması hesabına məhsul istehsalının artması ilə əlaqədardır.
BSC-nin bu yaxınlarda bu məsələ ilə bağı qərar verəcəyi gözlənilir və İrana hansı həcmdə məhsulun ixrac olunacağı hələ məlum deyil.
İxracın qəflətən dayandırılmasından sonra müəssisə məhsulunu az həcmdə yalnız Rusiyaya satıb.
Ölkənin iri vergi ödəyicilərindən biri olan BSC-nin istehsal gücü bir ildə 350 min ton təşkil edir. Şirkətin işçilərinin sayı isə 2 min nəfərdən çoxdur.
