Azərbaycan, Bakı, 24 yanvar/ Trend , müxbir İ.Xəlilova/ Azərbaycanın Maliyyə Nazirliyi viza blanklarının hazırlanması üzrə tenderin qalibi - Britaniyanın Optaglio şirkəti ilə onların formasını razılaşdırır. Bu barədə cümə axşamı nazirlikdən məlumat veriblər. Həftənin sonunadək viza blanklarının müxtəlif variantlarının müzakirəsi davam etdiriləcək.
Optaglio-nun mütəxəssislərinə növbəti həftələrdə Azərbaycanın müvafiq dövlət orqanlarının təkliflərini nəzərə almaqla, viza blanklarının sonuncu variantının London ofisi ilə razılaşdırma və Maliyyə Nazirliyinə təqdim edilməsi üçün vaxt ayrılıb. Akkreditin açılmasından sonra 60 gün müddətində viza blankları Azərbaycana gətirilməlidirlər. Sifarişin ümumi həcmi ölkəyə gələn əcnəbi vətəndaşlar üçün 500 min təşkil edir.
Optaglio bu işi 199min avroya görəcək.
Ötən il sentyabrın 18-də keçirilən tenderdə ümumilikdə beş şirkət iştirak edib. İkinci yer blankların hazırlanma dəyərini 345 min avro, hazırlanma müddətini isə 110 gün təklif edən Polşanın "Fabrike çennıx bumaq", üçüncü yer isə, Ukraynanın "Poliqrafiçeski kombinat" müəssisəsinə (sifarişin qiyməti $450 min, hazırlanma vaxtı 16-17 həftə) verilib.
Onlardan əlavə, tenderdə Litvanın Carsu Pasarlius və Estoniyanın Vaba Maa şirkətləri iştirak ediblər.
Tenderin şərtlərinə görə, viza blankları müdafiə elementlərinə malik olmalı, həmçinin, dünya standartlarına cavab verən kağızdan hazırlanmalıdır.