Azərbaycan, Bakı, 26 fevral / Trend , müxbir İ.Xəlilova / Hindistan və Norveç Ümumdünya Ticarət Təşkilatına (ÜTT) daxil olma çərçivəsində ikitərəfli danışıqların aparıldığı ölkələrin siyahısına onların da daxil edilməsi xahişi ilə Azərbaycan hökumətinə müüraciət edib. Bu barədə çərşənbə axşamı Danışıqlar qrupunun rəhbəri, xarici işlər nazirinin müavini Mahmud Məmmədquliyev bildirib.
Hazırda ölkə ABŞ, Avropa İttifaqı, Cənubi Koreya, Yaponiya və Çinin Tayvan əyaləti ilə danışıqlar mərhələsindədir.
"ÜTT İşçi qrupu ilə görüşlərin növbəti raundunun keçirilməsi ləngiyəcəyi təqdirdə, biz ikitərəfli danışıqlar tarixini bu ölkələrin paytaxtında və ya Azərbaycanda razılaşdırmaq niyyətindəyik" - deyə nazir müavini vurğulayıb.
"İndiyədək bunu etmək mümkün olmayıb, belə ki, danışıqların davam etdirilməsi üçün baund-tariflərin yenilənmiş variantını, yəni Azərbaycan bazarına mal və xidmətlərin daxil olması üçün gömrük tariflərinin maksimal məbləğinə dair təkifləri, ÜTT tələblərinə müvafiq olaraq qanunvericiliyin approksimasiyasını, bank, sığorta, telekommunikasiya, energetika bazarına daxil olmaya dair təklifləri təqdim etmək lazım idi. Onlar dünya təşkilatının katibliyinə artıq təqdim olunub" - deyə Məmmədquliyev vurğulayıb.
Azərbaycan Türkiyə, Gürcüstan, Oman, Moldova və BƏƏ ilə danışıqları başa çatdırıb. Lakin yekunlara dair protokol yalnız Türkiyə ilə imzalanıb. Nazir müavininin sözlərinə görə, Oman ikitərəfli sənədi imzalamağa hazır olduğunu artıq təsdiqləyib, BƏƏ isə sənədin hələlik missiya səviyyəsində imzalanmasını təsdiqləyib. Layin yekun qərarın hökumət tərfindən verilməsi gözlənilir.
Müəlliflə əlaqə saxlamaq üçün elektron ünvan : capital