Azərbaycan, Bakı, 05 may/ Trend , müxbir Ü.İsmayılova/ Azərbaycan sığortaçıları Assosiasiyasının çərşənbə axşamı keçiriləcək iclasında "Məcburi sığorta haqqında" Qanuna bəndlərin daxil edilməsi üçün təkliflər müzakirə ediləcək. Bu barədə bazar ertəsi Assosiasiyanın icraçı direktoru Qafar Məcidov məlumat verib.
"Sabahkı iclasda sığorta şirkətləri və Dövlət Sığorta Nəzarəti Xidmətinin nümayəndələri iştirak edəcəklər", - Məcidov bildirib.
Hazırda Azərbaycanda məcburi sığorta üzrə bir neçə qanun var. Dövlət Sığorta Nəzarəti Azərbaycan parlamentinə bütün qanunları vahid "Məcburi sığorta haqqında" qanunda birləşdirməyi təklif edir.
Məcidovun sözlərinə görə, sabahkı iclasının yekunları üzrə qanuna bəndlərin daxil edilməsi haqqında təkliflər paketi hazırlanacaq və Dövlət Sığorta Nəzarətinə veriləcək. O isə öz növbəsində təkliflər paketini Azərbaycan parlamentinə təqdim edəcək.
Azərbaycan Sığorta Şirkətləri Assosiasiyası 2006-cı il dekabrın 29-da təsis edilib. Assosiasiyanın Müşahidə Şurasına Azərbaycanın beş sığorta şirkəti - MBASK, Standard Insurance, Beynəlxalq Sığorta Şirkəti, Azersigorta, Ateshgah daxildir.
Müşahidə Şurasının sədri Standard Insurance SŞ-nin baş direktoru Kamal İbrahimov, sədrin müavini MBASK SŞ idarə heyətinin sədri Cəmil Məlikovdur.
Müəlliflə əlaqə saxlamaq üçün elektron ünvan: [email protected]