Azərbaycan, Bakı, 06 may / Trend / Azərbaycan Kredit İttifaqları Assosiasiyasının təşkilatın beş illiyinə həsr olunmuş III illik konfransının keçirilmə tarixi müəyyən olunub.
Təşkilatın məlumatında bildirilir ki, konfrans USAID (ABŞ-ın Beynəlxalq İnkişaf Agentliyi), Dünya Bankı, Şərq-Qərb İdarəçilik İnstitutu (East -West Management Institute) və ACDI/VOCA-nın (ABŞ) maliyyə dəstəyi ilə mayın 15-16-da keçiriləcək.
Konfransda əsasən Azərbaycanda akademiya kredit ittifaqının yaradılması (Universitet tərkiblərində kredit ittifaqları) və Assosiasiyanın beş illik məsələləri müzakirə olunacaq.
Görüşdə Harvard və Massaçuset Universitetlərinin (ABŞ) ekspertləri, Rusiyanın Kredit İttifaqları Liqası, Qırxızıstan və Litvanın Kredit Assosiasiyalarının idarə heyətlərinin sədrləri iştirak edəcək.
Konfransda Azərbaycan Milli Məclisinin İqtisadi siyasət daimi komissiyasının rəhbəri Ziyad Səmədzadə, Milli Bankın Baş direktoru Rüfət Aslanlı, Maliyyə və Kənd Təsərrüfatı nazirliklərinin nümayəndələri, Kənd təsərrüfatı kreditləri üzrə Dövlət Agentliyi, USAID, ACDI/VOCA və digər struktur nümayəndələrinin iştirakı planlaşdırılır.
Azərbaycan Kredit İttifaqları Assosiasiyası - AKİA beş il öncə beş kredit ittifaqı və iki fiziki şəxs tərəfindən təsis olunub. Assosiasiya Azərbaycanın Qeyri-Hökumət Təşkilatları Mili Forumu, Beynəlxalq Mikromaliyyələşdirmə Mərkəzi (MFC), Qeyri-Hökumət Təşkilatlarının Ümumdünya Assosiasiyasının üzvüdür.
Bundan əlavə, AKİA-dan verilən məlumata görə, WOCCU-nun (Kredit İttifaqlarının Ümumdunya Şurası) cari ilin iyul ayında Honkonqda keçiriləcək növbəti illik konqresində AKİA-nın üzvlük məsələsinə dair qərar qəbul oluna bilər.
Bu gün Assosiasiya Azərbaycanda fəaliyyət göstərən 78 kredit ittifaqından 51-ni özündə birləşdirir. Təşkilat Dünya Bankının Respublikanın Maliyyə və Kənd Təsərrüfatı nazirlikləri arasında əldə olunan razılıq çərçivəsində Azərbaycanın kənd təsərrüfatının kreditləşdirilməsi üzrə layihəsini reallaşdırmaqla məşğul olur. Bu layihə çərçivəsində artıq 40 mindən artıq xüsusi şəxs kredit əldə edib.
AKİA-nın əsas məqsədi həm regional, həm də beynəlxalq səviyyədə kredit ittifaqlarının (Kİ) genişləndirilməsinə yardım göstərmək, yeni Kİ-nin yaradılmasına kömək etmək, Kİ işlərinin yaxşılaşdırılması istiqamətində onların üzvləri üçün treninqlər təşkil etmək, Kİ ilə donor təşkilatları arasında əlaqələrin yaradılması və Kİ hüquqlarının müdafiəsindən ibarətdir.
