Azərbaycan, Bakı, 27 may / Trend , müxbir E.İsmayılov/ Bu il Şamaxı avtomobil zavodunda 2,5 min avtomobilin istehsalı planlaşdırılır. Bu barədə çərşənbə axşamı "Evsen" Şirkətlər Qrupunun nümayəndəsi bildirib. Gələn il müəssisədə 5 min avtomobilin istehsalı nəzərdə tutulub.
Bu gün müəssisənin istehsal gücü ildə 3,6 min avtomobil təşkil edir. Gələn ildən yeni avadanlıqların quraşdırılması hesabına, müəssisənin istehsal gücünün genişləndirilməsi planlaşdırılır. Bu, gələcəkdə istehsal gücünü 109 min avtomobilə çatdırmağa imkan verəcək.
Bu gün "Evsen" Şirkətlər Qrupu, "IranKhodro" zavodu və İranın İxac İnkişaf Bankı arasında Azərbaycanda 10 min ədəd "Azsamand EL" (4 min), "Azsamand LX" (4 min), "Azsamand Soren" (2 min) markalı avtomobillərin istehsal edilməsi üzrə müqavilə bağlanıb. Sövdələşmənin dəyəri 73 mln. dollardır.
Müqavilə Şamaxı şəhərində birinci Beynəlxalq biznes konfransı çərçivəsində imzalanıb. Konfransın təşkilatçıları Azərbaycanın İqtisadi İnkişaf Nazirliyi, İnvestisiyaların Təşfiqi Fondu (AZPROMO) və "Evsen" Şirkətlər Qrupudur.
