Azərbaycan, Bakı, 09 iyul/ Trend , müxbir İ.Xəlilova/ "Kapital Bank" ASC-nin tam özəlləşdirilməsi onun kapitalına təsir etməyib və bankin Nizamnamə kapitalı 24 milyon manat təşkil edir, çərşənbə günü "Kapital Bank"ın Marketinq və Strateji İnkişaf Departamentinin direktoru Samirə Şərifova deyib.
Bankın səhmləri nominal üzrə satılıb. Lakin özəlləşdirmənin ilkin mərhələsinin (dövlət payının 50 faizinin satılması) əlavə emissiya səhmləri ilə müşayiət edilməsi bankın Nizamnamə kapitalının iki dəfə artmasına gətirib çıxarıb. "İkinci mərhələdə (qalan 50 faizin satılması üzrə) dövlət qüvvədə olan kapitaldakı payını satıb", - Şərifova dəqiqləşdirib.
Əvəllər tam dövlət bankı, indi isə tam özəlləşdirilmiş bank olan "Kapital Bank"ın səhmdarlarının son strukturu aşağıdakı kimidir: AtaHolding 35 faiz, Xalq Bank 20 faiz, Pasha Holding 15 faiz, Azersun Holding 15 faiz, Xalq Sigorta 7,5 faiz səhmə malikdirlər. Yerdə qalan səhmlər müvafiq olaraq 5 faiz və 2,5 faiz olmaqla fiziki şəxslər və əmək kollektivi arasında bölüşdürülüb.
2008-ci il yanvarın 1-nə olan vəziyyətə görə, "Kapital Bank "ın aktivləri 249 466 min manat təşkil edir. Bankın öhdəliyi 209 555 min manat, balans kapitalı 39,81 milyin manat, ümumi kapitalı 35,429 milyon manat dəyərində formalaşdırılıb. Bank əməkdaşlarının sayı 2458 nəfərə çatır.
Hazırda bank bütün respublika regionları üzrə 87 filiala, 2 müstəqil şöbəyə və filialın tabeçiliyində 97 şöbəyə, 12 valyuta mübadilə məntəqəsinə malikdir. Gələcəkdə bank fəaliyyətini Azərbaycandan kənarda genişləndirmək və MDB ölkələrində 2 nümayəndəlik açmaq fikrindədir
Iyulun 9-na olan cari valyuta məzənnəsi 0,8094 AZN/USD-dır.
