Azərbaycan, Bakı, 15 iyul/ Trend , müxbir İ.Xəlilova/ Azərbaycan Dövlət Neft Şirkətinin Dərin Özüllər Zavodunun ərazisində tikiləcək gəmiqayırma zavodunun səhmdarları bu həftə yeni texniki-iqtisadi əsaslandırmanın (TİƏ) və layihənin biznes-planının hazırlanması üçün cəlb olunan konsaltinq şirkətini müəyyən edəcəklər. Bu barədə çərşənbə axşamı Azərbaycan İnvestisiya Şirkətinin (AİŞ) icraçı direktoru Anar Axundov məlumat verib. Onun sözlərinə görə, AİŞ-ə bu sahədə ixtisaslaşmış bir neçə beynəlxalq şirkətdən təklif daxil olub.
"Biz neçə maraqlı təklifi seçmişik və bu həftə konsaltinq şirkətini müəyyən edəcəyik", - Axundov qeyd edib.
Cəlb olunan şirkət Koreyanın STX şirkəti ilə birgə bazarı analiz edəcək, TİƏ üzrə daha optimal həlli seçəcək, biznes-plan hazırlayacaq. Layihənin reallaşdırılmasına başlanılması üçün bu tədbirlər sentyabrda-oktyabrın əvvəlində başa çatmalıdır.
ARDNŞ, Azərbaycan İnvestisiya Şirkəti və Koreyanın STX şirkəti arasında mayın 19-da Azərbaycanda gəmiqayırma zavodunun tikintisi haqqında memorandum imzalanıb. Azərbaycan Dövlət Neft Şirkətinin layihədə iştirak payı 65 faiz, AİŞ - 10 faiz, STX Shipbuilding Co., Ltd. İştirak payı isə 25 faiz təşkil edib.
AİŞ rəhbəri bildirib ki, Xəzər Dəniz Gəmiçiliyinin səhmdarların tərkibinə cəlb edilməsi hökumətin qərarından asılıdır. Başlanğıc mərhələdə XDG ilə layihəyə qoşulmaqla bağlı danışıqlar aparılıb.
Yeni konsepsiya üzrə zavodun artıq mövcud infrastruktun bazasında tikilməsi nəzərdə tutulduğu üçün layihənin dəyəri ilkin qiymətləndirmələrə nisbətən ucuzlaşacaq.
Mövcud TİƏ variantına əsasən, yeni zavodun tikintisi $400 mln.-a başa gəlirdi (limanın tikintisi üzrə xərclər nəzərə alınmadan).
Axundov layihənin reallaşdırılması üçün xarici maliyyələşdirmənin cəlb ediləcəyi ehtimalını istisna etməyib.
"Layihələr reallaşdırılarkən şəxsi kapital və borc kapitalının müvafiq olaraq 30 faizin 70 faizə standart nisbətindən istifadə edilir. Lakin gəmiqayırma zavodunun tikintisi üçün bu nisbətin dəyişdirilməsi nəzərə alınmaqla xarici mənbələrdən kreditin cəlb edilməsi nəzərdə tutulur ki, bu da layihənin səmərəliliyindən asılıdır", - Axundov bildirib.
Konsaltinq şirkəti həmçinin gələcəkdə beynəlxalq maliyyə institutlarından kreditlərin cəlb edilməsi istiqamətində işləyə bilər. Bununla əlaqədar səhmdarlar cəlb olunan məsləhətçinin bu sahədə yaxşı təcrübə və beynəlxalq ada malik olmasında maraqlıdırlar.
İlkin mərhələdə zavodun idarə edilməsi və yeni texnologiyaların implementasiyasını STX həyata keçirəcək. Axundov sonradan bir neçə il ərzində idarəsinin əsas səhmdara - ARDNŞ-a veriləcəyini söyləyib.
Zavod ən yaxşı halda tikintinin başlamasından 3-4 il sonra istismara veriləcək. Tikintinin bu il başlaması planlaşdırılıb. Obyektin 2011-ci ildə istismara verilməsi nəzərdə tutulub.
Gəmiqayırma zavodu Azərbaycanın Qaradağ rayonunda yeni neft terminalı və limanın tikintisi layihəsinə qarşılıqlı əlavə olacaq. Bu terminal vasitəsilə sonradan Bakı-Tbilisi-Ceyhan kəmərilə Avropaya tranzit üçün Qazaxıstan nefti nəql ediləcək. Qazaxıstan tankerləri Xəzər regionunun digər gəmiləri kimi, AR-nın gəmiqayırma zavodunda təmir edilə bilər. Güman edilir ki, regionda analoji müəssisə olmayacaq və gəmilərin tikintisi üçün sifarişlər həm ölkə daxili, həm də ölkə xaricindən qəbul ediləcək.
Hazırda 250-dən çox gəmiyə malik Xəzər Dəniz Neft Donanması ARDNŞ-ın balansındadır. Bütün bu gəmilər ölkənin Dövlət Neft Şirkətinin dəniz əməliyyatlarının dəstəklənməsi ilə məşğul olur. Bundan əlavə, donanmanın gəmiləri Xəzərin Azərbaycan şelfində və ondan kənarda işləyən iri xarici şirkətlərin dəniz əməliyyatlarının dəstəklənməsində iştirak edir. Ekologiya və Təbii Sərvətlər Nazirliyi (əsasən tədqiqat gəmiləri), Dövlət Sərhəd Xidməti az sayda gəmiyə malikdir, həmçinin balıqçılıq gəmiləri var.
Azərbaycan Dövlət Xəzər Dəniz Gəmiçiliyi Xəzərdə yük və sərnişin daşınmalarını həyata keçirən gəmilərə malikdir. Bu gün Xəzər Dəniz Gəmiçiliyinin nəqliyyyat donanmasının tərkibinə 86 gəmi daxildir. Onlardan 41-i tanker donanması (1 sudaşıyan daxil olmaqla), 35-i quru yük donanması, 10-u yardımçı gəmidir. Donanmanın tərkibində Ro-Ro tipli unverisal gəmilər, həmçinin dəmiryol-sərnişin bərələri var.
İyulun 15-nə olan cari məzənnə - 0,8051 AZN/USD.
Müəlliflə əlaqə saxlamaq üçün elektron ünvan: [email protected]
