Azərbaycan, Bakı, 30 iyul/ Trend , müxbir E.İsmayılova/ Azərbaycanın Nəqliyyat Nazirliyi payızda Bakıda nəqliyyatın intellektual idarə edilməsi mərkəzinin bünövrəsini qoyacaq. Bu barədə çərşənbə günü Azərbaycanın nəqliyyat nazirinin müavini Musa Pənahov məlumat verib.
"Hazırda intellektual idarəetmənin özünün və intellektual idarəetmə mərkəzinin yaradılması üzrə layihələndirmə işləri başa çatır. Sentyabrda isə bu mərkəzin bünövrəsini qoymağı planlaşdırırıq", - Pənahov söyləyib.
Podratçı hazırlıq işləri aparıb, intellektual idarəetmənin yaradılması və müvafiq mərkəzin tikintisi üzrə layihələndirmə işləri başa çatır.
Paralel olaraq bu sistemin tətbiqi üçün Bakının bütün küçələrində tədqiqatlar aparılır.
Nəqliyyat sisteminin intellektual idarə edilməsi sistemi $60 mln.-dan çox qiymətləndirilir. 2008-ci il mayın 19-da Koreyanın nəqliyyat nazirinin müavini və Nəqliyyat Nazirliyi arasında bu layihənin reallaşdırılmasının başlanılması üçün avadanlığın alınmasına dair müqavilə imzalanıb.
Bakıda belə sistemin yaradılmasında məqsəd bir məntəqədən nəqliyyat sisteminin - sərnişin daşınmalarının, avtomobil marşrutlarının, dayanacaqların idarə edilməsindən, tıxacları təcrid və ya ləğv etməkdən ibarətdir.
Azərbaycan Milli Bankının iyulun 30-na olan rəsmi məzənnəsi 0,809 AZN/USD təşkil edir.
Müəlliflə əlaqə saxlamaq üçün elektron ünvan: [email protected]
